Kan ramin a mamawh ber chu sorkar ṭha a ni - MPCC President

Mizoram Pradesh Congress Committee (MPCC) hruaitute chuan 'Chhim hrût fehchhuah' an kalpui mek a; nimin khan Lunglei Press Club-ah thuthar thehdarhtute kâwmin, MPCC president Lalsawta chuan, Mizoramin a mamawh ber chu sorkar ṭha a nih thu a sawi.

MPCC President chuan, sorkar ṭha nei turin duhâmna leh induhsakna a bo a ṭul thu a sawi a, "Kan ramin a mamawh ber chu sorkar ṭha a ni. Ram hruaitute hmathlir ṭâwmpui phak loh vànga dodálnate awm mah se, ram leh mipui tan a ṭhat dawn phawt chuan sut tlang luih ngamna, political will kan nei ang," a ti.

Congress party chu a dang­lam tawh nia sawiin Lalsawta chuan, "Pathian leh mipui zara sorkarna kan siam a nih a, kum 5 chhung mahni inhrêk ngama sorkar kan kalpui ngat chuan kan ram leh mipui pawh kan danglam ngei ngei ang tih kan ring tlat," a ti a; minister leh MLA-te an danglam chuan hmun hrang hranga party hruaitute leh mipui pawh an danglam tur thu a sawi.

Lalsawta chuan, Mizoramin chhiat lam leh ṭhat lam a pan theih thu sawiin, "Tunah hian kawng dik zawh turin kan la tlai lo. Sum hmanga ram rorèlnaa luh tumtute hi kan ram hmelma an ni a, mipuiin kan hnâwl a ngai. Lei theiha min ngaitute hian min hmangaih lo a, min zuam em em ringawt a ni," a ti.

Congress party-in sorkarna a siam chuan ṭang puihna hmangin ṭhalai leh kut hnathawktute dinchhuahna tur an buatsaih tur thu sawiin Lalsawta chuan, "Hei hian mihring rilru hruai dikin taimâkna leh rinawmna a hring ang. Sorkarin hnam ro ṭha pui pui siam ṭeuh mah se, khawtlang nun a tlákbal a, diknain ram rorêlnaah hmun a chan loh chuan kan hnam hi tluchhe thei a ni," a ti a, sorkar policy leh programme-te Pathian leh kohhrante duh zawng anga tih an tum thu a sawi.

Congress party President chuan, lung-ina awmte 'Sual theih lohna báwm' ang ni lo, mipuiin hlim leh nuam ti taka an awm a, an dinchhuah theihna túr ram rorelna ṭha, 'ṭhat loh theih lohna sorkar' an siam tur thu sawiin, "ṭhat loh theih lohna báwm kan tih hi báwm tak tak a ni lo, kalphung dik sawina a ni. Mizoram mipuite hruai nawmzia te, kan taimakziate kan hria a, kalphung dika kan kal chuan rei lo têah kan dingchhuak ngei ang," a ti.

MPCC President hi vice presi­dent Lal Thanzara leh treasurer Zodintluanga Ralte ten an ṭawiawm a ni.