MNF hruaitute'n sorkar hna thawk tur an la - ZPM Ṭhalai
ZPM Ṭhalai Headquarters vice president Dr C Lalrammawia chuan, East Lungdar MNF Group-in SEDP hnuaiah zirtirtu pahnih leh LDC pakhat lâkna tur advertisement an chhuah a, MNF unit hruaitute nen March 18, 2022 khan thawktu tur an lâk thu a sawi.
Nimina Aizawl Press Club-a thuthar thehdarhtute an kawmnaah Dr C Lalrammawia chuan, kum 2021 khan advertisement chhuah loin SEDP hnuaiah zirtirtu 154 lâk an nih thu a sawi a, "Tun hnai khan East Lungdar MNF Group Secretary hmingin SEDP hnuaiah zirtirtu pahnih leh LDC pakhat lâkna tur advertisement chhuah a ni," a ti.
Dr C Lalrammawia chuan, "March 18, 2022 zan khan East Lungdar MNF Group office bearer-te leh Unit office bearer-te ṭhukhawmin kum khat chhung thawk tur leh thla khata Rs 10,000 hlawh turin E Lungdar H/S atan LDC pakhat, E Lungdar P/S-I leh P/S-II atan zirtirtu pakhat ve ve an la a ni," a ti a; MNF unit leh group-in sorkar hna an la chu MNF sorkar hnuaiah danin awmzia a neih lohzia tilangtu a nih thu a sawi.
ZMP Ṭhalai hruaitute sawi danin, E Lungdara LDC leh zirtirtu hna ruak dil theih chungchang chu Whatsapp group pakhat, 'DARKHAWPUI TITI-1' ah East Lungdar MNF Group Secretary hminga post a ni a; 'Mizoram sawrkar flagship programme SEDP aṭangin zirna tihhmasawn leh tihchangtlun nân a hnuaia hnate hi E. Lungdâr tan rawn siam a ni a. Dil duh chuan a hnuaia sawite hi zâwmin ni 18.03.2022 (Zirtâwp) dâr 5:00 pm thlengin Pu R.T. Thangvunga, Secretary, E.Lungdâr MNF Group hnenah thehluh theih a ni e,' tia ziah a ni.
ZPM Ṭhalai chuan, MNF kaihhruai Mizoram sorkara sorkar hna lâknaah ruling party unit leh group-te an inrawlh thûk chu MNF sorkarah dan rorelna leh diknain hmun a chan lohzia tichiangtu a nih thu sawiin, “SEDP pawisa hi mipui sum, mipui ta liau liau a nih laia party fund ang leka ruling party unit leh group-te’n an hmang hi mipui zah lohna lian takah kan ngai. Kan suangtuah phâk baka Mizoram zirna suasam a ni hi pawi kan ti,” an ti a; dik taka hna lâk kalpui ṭha leh turin MNF sorkar an phût.
ZPM Ṭhalai hian nimin vêk khan an vice president Dr C Lalrammawia hmingin School Education Minister hnenah lehkha an thehlut a; East Lungdara MNF group leh unit kaltlanga hna lak chu kaltlangpui lo tur leh School Education department hmalaknaa zirtirtu leh LDC la ṭha leh turin an ngen a ni.