KHAWTHLIR
Thisen pe
Pentecostal Youth Department (NEI)-te chuan PYD Day pualin nimin khan hmun hrang hrangah thisen unit 95 an pe a, petute mipa 80 leh hmeichhia 15 an ni a; PYD Siaha Bialin unit 42, Hnahthial Bialin unit 33, Chaltlang Bialin unit 13 leh Zonuam Bialin unit sarih an pe a ni. Adventist Youth Federation, Aizawl West Branch pawhin Global Youth Day pualin nimin khan Civil Hospital, Aizawlah thisen unit 51 an pe a, petute mipa 41 leh hmeichhia 10 an ni a; mimala a thlàwna pe mi 19 an awm bawk.
Lawmpuina hlan
Serlui bialtu MLA Lalrinsanga Ralte chuan nimin khan Indian Institute of Technology-a zir tura inziak tling, a bial chhung mi Vanlalnunmawia Ngente, Buhchangphai hnenah lawmpuina Rs 50,000 a hlân.
Kawng thar lawm
Aizawl South-II bialtu MLA Lalchhuanthanga’n a MLA fund leh a mimal sum hmanga Lungleng leh Aizawl inkar kawng thar a siam chu nimin khan a lawmna hun an hmang a, ZPM leader Lalduhoma leh party hruaitute’n an hmanpui. Kawng hi km. 15-a thui niin, siam nan Rs 4,30,000 hman a ni a; kumin January 7-22 chhungin lirthei kal theiha sial tlang a ni.
Intihsiak buatsaih
Rotary Club of Aizawl chuan World Water Day pualin nimin khan Helen Lowry HSS leh KM HSS-ah intihsiak an buatsaih a; pawl 8-10 zirlaite tan 'Ground water: making the invisible visible' tih thupui hmangin lemziaka intihsiak buatsaihin, pawl 11-12 zirlaite tan 'Water scarcity in Aizawl and it's solution' tih thupui hmangin essay inziahsiak an buatsaih.
Chinese Carp Hatchery hawng
Agriculture minister C Lalrinsanga chuan nimin khan Lengpuia KVK training hall-ah Chinese sangha tui keutirna tur, Chinese Carp Hatchery a hawng a, KVK pisa leh laboratory a enfiah bawk. Hawnna inkhawma tarlan danin, Chinese Carp Hatchery-ah hian vawi khatah sangha tui nuai 20 vel keutir theihna tur incubation pool (tui keutirna) siam a ni dawn a, ni 40-50 chhung sangha dahna tur nursery pool leh vawi khata sangha tui nuai 40 dah theihna tur spawning pool siam a ni. Indian major carp leh exotic major carb sangha note tuitira keutir tum a ni bawk.
FEMSE-in phût
Federation of Mizoram Samagra Siksha Employee (FEMSE) chuan thuchhuah siamin, an service dinhmun zir chiang tura sorkarin a din study group chuan kum thum hmel a hmu tawh tih an tarlang a, "Study group-in rawtna a siamte tihlawhtling thuai tur leh hamṭhatna kan dawn ve turte a hma thei ang bera kan hmuh theih nan sorkar kan phût a ni," an ti.
Jubilee lawm
Champhai Venglai Presbyterian Kohhran chuan nimin khan an kohhran din cham vawi 40-na (Ruby Jubilee) an lawm. Jubilee pual hian Champhai District Hospital-ah water cooler an pe a, Synod Rescue Home, Champhaiah cheng nuai 25 senna tur Chapel an sa bawk.