Zûk leh hmuama dinhmun zirho

National Tobacco Control Programme (NTCP) leh National Health Mission (NHM), Mizoram chuan nimin khan Mizoram Journalist Association member-te tan Aizawl Press Club-ah 'Workshop cum consul­tative meeting on Global Youth Tobacco Survey-4 & Tobacco Free Educational Institution' an buatsaih a, NHM mission director Dr Eric Zomawia'n a hmanpui.

Dr Eric Zomawia chuan, vaihlo an buai­puina a rei tawh thu sawiin, "Zûk leh hmuam zirchianna hrang hrang leh cancer natna veiah Mizo­ram chu pakhatna kan ni deuh zel a, a pawi tak zet. Hma kan lâknate'n awmzia neiin zawi zawiin hma kan sâwn ve zel a, hmalakna tur erawh a la tam hle," a ti a; zûk leh hmuam ṭhat lohna chu Mizo mipuiin hre tam mah se, an zawm ṭhat peih loh thu leh inzirtirna kawngah ṭan lâk zel a ṭul thu a sawi.

MJA president Zonun­sanga Khiangte pawhin thu sawiin, vaihlo zûk leh hmuam ṭhat lohna puan­zarna leh tobacco free village tam zawk neih belhna turah MJA chu sorkar thawhpui tura a inpeih reng thu a sawi.

NTCP state consultant R Lalremruata tarlan danin, Global Youth Tobacco Survey-4 (GYST-4), 2019 chuan Mizorama zirna sikul 21-a kum 13-15 inkar zirlai 1,404 an zir chiannaah, 58% chuan vaihlo zûk leh hmuam an ti a, an zingah hmeichhia aiin mipa an tam zawk.

Zirhonaah hian NTCP state nodal officer Dr H Lianthangpuia, NTCP state Legal consultant Vanlalzari leh MJA member-te an tel a ni.