Kum 2023-ah MNF-in MLA seat 33 aia tlem lo kan la dawn - Robert Romawia

Minister of state leh MNF adviser Robert Romawia Royte chuan nimin khan Mizo Hnam Rûna inkhawmah thu sawiin, kum 2023 inthlanpuiah MNF-in MLA seat 33 aia tlem lo an lak dawn thu a sawi.

Robert Romawia Royte chuan, Covid-19 hripuiin kum hnih chhung Mizoram a nuai tawh a, mimal, chhungkua leh páwlin harsatna an tâwk a, sorkar pawhin harsatna a tâwk tih sawiin, “Covid hripui léng mahse Pu Zoramthanga kaihhruai sorkar kal a khám lo. Kum 2023-ah chuan Pathian leh mipui zarah MNF-in MLA seat 33 aia tlem lo kan la ang,” a ti.

MNF sorkar hnuah SEDP aṭangin kawngpui an siam tih sawiin Robert Romawia chuan, “Kum thum chhungin cheng nuai 80,000 chuang infrastructure siam nan kan hmang. Congress-in NLUP an kalpui chhung khan kawngpui kháp khat pawh an siam lo,” a ti a, kawngpui an siamte chu ruling leh opposition te, mi rethei leh hausate’n an chhawr vek thu a sawi.

Robert Romawia chuan, MNF sorkar hnuaiah sorkar leibá a pung lo nia sawiin, “RBI document tarlanah a chiang,” a ti a; Gross State Domestic Product (GSDP) aṭanga chhûtin Congress sorkar lai aiin MNF sorkarah leiba a tlahniam hle zawk nia sawiin, “Covid-in min tibuai lo phei se chu hmasawnna a kal chak hle ang a, leiba a tlahniam hle tawh ang,” a ti.

MNF Adviser tarlan danin, kum 2016-ah Mizoram GSDP aṭanga state leibá chu 46.7% a ni a; kum 2017-ah 34.9%, kum 2018-ah 38.9%, kum 2019-ah 38.9%, kum 2020-ah 35.8% leh kum 2021-ah 32% a ni.