AMC budget tam lo mahse dik taka kan thawh chuan hmasawnna a awm thei - Malsawmzuala

ZPM party chuan nimin khan an pisaah tun hnaia AMC Board of Councillors meeting thlirlêtna hun an hmang a; ZPM group leader Malsawmzuala Ralte chuan, kum 2022-23 atana AMC budget chu tam lo mahse dik leh ṭha taka hna thawh a nih chuan danglamna leh hmasawnna tur tam tak a awm thei tih a sawi.

AMC Ward-XVIII councillor Malsawmzuala Ralte chuan, kum 2022-23 AMC budget pass tâk chu cheng nuai 6,500.69 a nih thu sawiin, “AMC-in leibá a nei lo a, loan pûk a neih loh bawk avangin budget hi tam lo mahse dik leh ṭha taka hna kan thawh chuan danglamna leh hmasawnna tur tam tak a awm thei dawn a ni,” a ti.

Malsawmzuala Ralte chuan, ni hnih awh AMC BOC meeting-ah zawhna 12 lut zinga 10 chu ZPM councillor-te zawhna a nih thu te, motion lut zawng zawng (pariat) chu ZPM councillor-te put luh vek a nih thu te, BOC meeting chu live telecast ni ve tawh se an duh thute a sawi bawk.

AMC opposition deputy leader C Lalchhandami pawhin thu sawiin, ZPM councillor-te’n BOC meeting-ah theihtawp an chhuah thu a sawi a, “Aizawl khawpuiin hmasawnna hmél thar kan hmuh theihna tura thu pawimawh tak tak - area classification, GPS, cesspool (êk paihna), kawngpui péngṭhuam pawimawh chhinchhiahna siam, property tax return leh pawimawh tak tak pu lutin zawhna kan siam a ni,” a ti.