Bamboo leh Horticulture Board-te'n Kum hnih atan nuai 69.65 hmu tawh

Bamboo Development Board hmalakna leh hnathawh chungchang RTI Act hmanga dilna, Horticulture department SPIO-in a chhan danin, Bamboo Development Board ruahmanna angin Horticulture department chuan SEDP hnuaiah Lengpui leh Hmunpuiah Model Bamboo Plantation an kalpui mek a ni.

Board-in hmalakna tur rua­hman lâwk a neihte zawhna chhángin SPIO chuan, Bam­boo Development Board kaihhruainain Horticulture department chuan sorkar kum thar 2020-21 atan hmalakna tur ruahmanna a siam thu leh chu chu Mizoram sorkarah thehluh a nih thu a tarlang.

Horticulture department SPIO tarlan danin, Model Bamboo Plantation enkawl chhunzawm nan cheng nuai 79.10 ruahman a ni a, SEDP 2020-21 hnuaiah Bamboo Plantation atan sorkarah rawtna thehluh tawh niin, ram hectare 150-a zau tuam tura ruahman a ni.

Bamboo Development Board-in kum hnih chhungin Rs. 34,82,650 an hmu a, chumi chhung vek chuan Rs. 21,33,390 an hmang. Kum 2019-20 chhung khan Rs. 14,48,650 hmuin, an hmang zo tawh a; kum 2020-21-ah nuai 20.34 hmuin, tun thlengin Rs. 6,84,740 an hmang tawh a ni. Bamboo Development Board hi din tirh aṭangin ṭum li an ṭhukhawm tawh.

Horticulture development Board hmalakna chungchangah SPIO chuan, Board chu ṭum nga an ṭhutkhawm tawh thu leh Board kaihhruainain Horticulture department official-te nen department hmalakna duan a nih thu leh, SEDP hnuaiah dragon fruit leh saptheiah hma an la mek a, Board hmalaknain department-in DPR a siam a, sorkarah an thehluh tawh thu a tarlang.

SPIO tarlan danin, Horticul­ture Development Board hian kum hnih chhungin Rs. 34,82,650 an dawng tawh. Kum 2019-20 chhungin Rs. 14,48,650 dawngin, an hmang zo tawh a; kum 2020-21 chhungin cheng nuai 20.34 hmu tawhin, Rs. 7,54,740 a hmang tawh a ni.