NEUM-in mass casual leave an ṭhulh

NHM Employees Union, Mizoram (NEUM) chuan an thil phût chungchanga sorkar hotute nen March thla laihawla ṭum hnih an inbiak hnuah March 21-23 chhunga a huhoa chawlh, mass casual leave lak an tum chu an ṭhulh tih an puang.

NHM, Mizoram hnuaia thawkte chuan Mizoram sorkara an thil phût hrang hrang nawr nan March 14-17, 2022 chhung khan badge dum an lo bel tawh a; chumi hnuah March 21-24 chhung mass casual leave lak leh an tum a ni.

NEUM tarlan danin, an thil phût chungchangah March 15 & 18 khan sorkar hotute nen an inbia a, chumi hma chuan DPAR changtu deputy chief minister Tawnluia, Health minister mawhphurhna la mektu hoin DPAR leh Health department hotute an lo ṭhukhawm tawh bawk.

NHM hnuaia thawk zinga Covid-19 veite'n enkawlna hmun - ZMC, DCHC leh CCC-a inenkawlna senso an chàwi tawhte chu pek lêt vek turin sorkar hotute'n an ruahman a, chumi chungchangah chuan nimin khan ZMC hotute nen an sawiho leh a ni.

Deputy Chief Minister chuan NEUM thil phûtte ngaihtuahtu Study Group report April thla chhung nghak rih turin NEUM a ngen a; Study Group report chu sorkar hmalakna atana chhawp chhuah tur a nih avangin report tel lo chuan sorkar tan hmalak a harsat thu a sawi.

Medical reimbursement bill leh transfer TA chungchang pawh Study Group thu ngaihtuah tur zingah telh a ni.

NEUM chuan, an thil phût hrang hrangah hmasawnna a awma an hriat thu sawiin, "Chuvangin, March 21-23, 2022 chhung mass casual leave lak kan tum chu ṭhulh rih nise kan ti a. Study Group report chhuah hunah lungawina khawp kan hmu lo a nih chuan pawlin hmalakna hmachhawp a neih tawh anga kal zel a ni ang," an ti.