AMRUT kalpui dan tur sawiho

Nimin khan deputy chief minister Tawnluia hoin a pisaah Atal Mission for Rejuvenation and Urban Transformation (AMRUT) 2.0 kalpui dan tur sawiho a ni a, scheme-in a kaihhnawih department hotute an tel.

AMRUT 2.0 hi October 1, 2021 khan Prime Minister-in a tlangzarh a, India ram khawpui hrang hranga chêng leh AMRUT-in a huam khawpui 500-a chêng mipuiin tui thianghlim hnianghnâr tak leh khawpui thianghlim leh hrisel an neih theihna tura duan a ni. Mizoramah chuan Census town 23-ah kalpui tura duân a ni.

Ṭhutkhawmah hian Mizoram khawpui 23-a chêng mi tinin tui thianghlim an neih theih dan tur ruahmanna te, tuihna tihpun dan tur leh ruahtui khawl dan tur te, Aizawl khawpui bik tan eng lai pawha (24x7) water supply neih theih dan turte leh, tui thli (liquid waste) sawngbawlna mumal zawka kalpui dan turte an rêl a ni.

AMRUT THIL TUM
1) Chhungkaw tinah tui thianghlim pek
2) Aizawl khawpui bik tana êk thli leh tuichhe sâwngbâwl
3) Tuihna humhalh leh siam bakah, park leh hmun hring siam