Airport chei hna chawlhtir turin BJP-in Chief Secretary an ngen

BJP, Mizoram Pradesh-a Central Scheme & Monitoring Cell chuan Lengpui Airport chei ṭhat hna thawh lai chu chawlhkar khat chhunga chawlhtir turin nimin khan Chief Secretary an ngen.

BJP Central Scheme & Monitoring Cell hian nimin khan chief secretary Dr Renu Sharma hnenah lehkha thehlutin, Lengpui Airport chei ṭhat hna thawh mek chungchang an thlen a,"Airport construction hna kal lai zawng zawngte kar khat chhunga chawlhsan vek tura hma la nghal turin kan ngen a, mithiamte endik hma chu hnathawh kal mek hi mipui tan a him tâwk loah kan ngai a, hna chawlhtir turin kan ngen a ni," an ti.

BJP chuan, “Mizoramin airport kan neih chhun, mipuiin kan chhuan em em leh ṭangkai taka kan chhawr mek tihchhiat a ni hi mipuite tan a thinrimthlak tak zet a ni,” an ti a; Chief Secretary-a an thu thlen chu ngaih pawimawh a nih loh chuan High Court-ah public interest litigation thehlut turin an inbuatsaih tih an tarlang bawk.