Vote zawnna atana thil tiam vak vakin awmzia a nei tawh lo - ZPM Leader
Ṭangrual pawl, Zoram Peoples' Movement (ZPM) leader K Sapdanga chuan, tunlai khawvelah vote zawnna atana thil tiam vak vakin awmzia a neih tawh loh thu a sawi.
K Sapdanga hian November 24, Inrinni khan Durtlanga a inah thuthar thehdarhtute a kâwm a; ramin a hma a sawn zel a, mipui pawhin politics-ah an duhtui tawh tih sawiin, "Vote zawnna atana thil tiam vak vakin awmzia a nei tawh lo. Candidate-te'n eng nge an tiam tih aiin, a tiamtu a rintlak em tih hi mipuite'n an chîk tawh zawk," a ti.
Sorkar chelhtute che zia enin, Kristian ramah ram roreltu lu ber atan kohhran upa ngei zawrh chu inthlahrun turah an ngai lo tih sawiin Sapdanga chuan, "ZPM hi Val Upate uapna hnuaiah kan inpumkhat telh telh. Tun thlenga MPF-te zilhhau ngai loa kan awm hi min duhsaktute ṭawngṭai chhanaah kan ngai," a ti a; hruaitute, worker leh candidate-te'n an tih theih tâwk leh thiam tâwk an tih tawh avangin, a bak chu Pathian kutah an dah tih a sawi.
ZPM Leader chuan, ṭangrual pawl chuan mipuite hmanga sorkar siam chauh an tum lo tih sawiin, "Kohhran leh khawtlang mipuite'n an thurualpui theih sorkar tun dinna atan ṭangrual pawl hi min hmang duh em, tiin mipui kutah kan rawn tlu lut a ni," a ti.
K Sapdanga chuan, MLA inthlan turah politics tuipui ngai reng reng lo, Pathian rawngbawltu hrang hrang te, chhungkaw nu ber te, ṭhalaite an phûr tih sawiin, "Vote thlak châk tak tak an tam tawh viau," a ti a; tun hmain tum ṭum anga mipuiin vote thlak an nghahhlelh a awm ngai lo tih a sawi.
Kumin MLA inthlan turah páwl hlawm pathum an inbûk dawn emaw an tih hman thu sawiin ZPM Leader chuan, "A tàwpkhâwkah chuan pawl hlawm pahnih chauh kan bûk dawn. Kum 30 chuang kan lo hrawn tawh, an chin pawh kan hriat chian tawhte bawk kan ko kir dawn nge, kan la hrawn ngai loh, tha thar rual kan enchhin dawn, tih mipuiin kan bûk dawn a ni," a ti.
ZPM Leader sawi danin, ZPM an sorkar chuan zu an zuar dawn lo a, kut hnathawktute lam an hawi dawn. Six Basic Needs behchhanin hna bul an ṭan dawn a, kum 5 chhungin kawlphethaa intodelh turin hna an thawk ang. Sorkar hmasa hnathawh leh hmachhawpte an chhunzawm dawn a; Kristian sakhua nuaibo duhtute nen an thawkho dawn lo thung.
MNF-te'n ZONET Cable TV-in chhiah a âwl ru nia an puh chungchanga thuthar thehdarhtute zawhna chhangin K Sapdanga chuan, "Thu hlui an rawn tharthawh a, a nihphung pawh an hre chiang; tunah hian a ṭangkai theih tâkin tiin an rawn sawi chhuak a ni ber mai. Kum 2004-ah ZONET kan din ṭan a, khatih lai khan Taxation hote nen kan titiho ṭhin a, an remtih dan ang zelin kan kal," a ti.
K Sapdanga chuan, "ZONET hian distributor eng emaw zat a nei a, distributor-te'n anmahnia connection an neih zat aṭangin chhiah an pe mai a. ZONET hmunpui pawhin direct-a connection an neih zat aṭangin chhiah an pe mai a ni," a ti a; chhiah pek a nih dan chu a duh tan chuan awlsam taka chhui fiah theih a nih thu a sawi.
K Sapdanga chuan, ZPM dinhmun tur zawhna dang chhangin, mipui leh Pathian zarah khawngaih an hlawh dawna an hriat thu a sawi a, "A mala sorkarna khawpte hi chu kan tling thei dawn lo'm ni, kan inti a ni," a ti. ZPM an sorkar phawt chuan, hna thawk turin mipuite inring turin an chah tih sawiin, "A thlawna sem hrim hrim hi chu kan tum lo, sawhthing chi pakhat pawh a thlawna sem kan tum lo," a ti bawk.