E.Roll-ah voter 2,214-in an pung Duty turte an chhuak ṭan dawn

Mizoram Legislative Assembly inthlanpui, naktip Nilainia neih turah vote thlak thei awm zawng zawng chu mi 7,70,395 an ni. Voter zat hi September 27, 2018-a Mizoram final electoral roll tihchhuah a nih hnuah 2,214-in a pung. Inthlana duty tur polling party-te chuan vawiinah an duty-na tur an pan ṭan dawn.

Tun ṭum Mizoram Assembly inthlanpui voter zawng zawng zinga mi 3,75,498 chu mipa an ni a, mi 3,94,897 chu hmeichhia an ni; mipa aia hmeichhia 19,399-in an tam zawk.

January 1, 2018-a kum 18 tling chin electoral roll-a thun turin Mizoram Electoral Roll Summary Revision tih a nih hnuah, September 27-ah final roll tihchhuah a ni a; chutah chuan Mizoramah voter 7,68,181 an awm. Final roll tihchhuah hnuah pawh Tripura-a Bru camp-a awmte telin electoral roll-a thun dilte thun belh zel a ni a, tuna electoral roll, naktip inthlana hman turah chuan voter 2,214-in a pun belh leh a ni.

Mizoram inthlanpui neih turah hian polling station pangngai 1,164 siam a ni a, Tripura-a awm mek Bru-te tan Kanhmunah polling station 15 siam a ni. Kanhmun temporary polling station-a vote thlak turte chu an awmna district ṭheuha polling party-te'n an buaipui ang.

Mizoram inthlanpui neih turah hian political party te, candidate-te leh anmahni puitute chu ngawrh takin an campaign mek zel a; campaign hun hi vawiin tlai dar 4-ah a tàwp dawn.

Inthlana duty tur polling party-te pawh an inpeih thawkhat tawh a; hmun hla deuha duty tur polling party 206-te chu vawiin hian an awmna district headquarters aṭangin an duty-na tur panin an chhuak ang. Vawiina chhuak tur zingah hian Aizawl district-ah Tuivawl leh Chalfilh biala duty tur te, Mamit district-ah polling station pali, Lunglei district-a khaw hla zual, Lawngtlai district leh Siaha district-a khaw hla leh kal harsa zualte a tel. Naktuk Thawhlehniah polling party 962 an chhuah leh dawn a ni.