CEO-in Lawngtlai a tlawh

Mizoram chief electoral officer (CEO) Ashish Kundra chuan November 24, Inrinni khan Lawngtlai a tlawh a; November 28-a Assembly inthlan awm tura Lawngtlai district inbuatsaihna leh an dinhmun a enfiah.

CEO hian DC pisaah Lawngtlai district-a official-te nen inthlan atana inbuatsaihna hrang hrang an thlirho a ni a; Ashish Kundra chuan, inthlanna felfai tak buatsaih tura tih tur hmabak la awmte chu ṭha taka hlen chhuah tum turin a chah.

Meeting-a tarlan dan­in, Lawngtlai district-ah hian assembly constituency pathumah polling station 161 a awm a, chu'ng polling station awmna khuate zingah, Kakichhuah chu ke leh lawng hmanga kal pawh ngai a ni a, a bak zawng chu motor-a thlen theiha siam vek a ni tawh.

Buaina chhuah palh hlauhthawnawmna (vulnerable) polling station-te venhimna ruahman dan te, vote thlak nia inbiak pawhna leh report hrang hrang pek dan tur rua­hmannate pawh thlirho a ni.

Ashsih Kundra chuan, Lawngtlai College-a strong room a enfiah a, vote chhiarna tur counting hall buatsaih dan leh chet vel dan tur rua­hmanna te, control room leh thil ṭul dang buaipui ngaite official-te nen an sawiho nghal.