ZPM-in CADC ṭhiah theih nan hma lak tum

ZPM Vigilance department chuan, Pa­thian leh mipui zarah ZPM-in sorkarna an siam chuan, dan loa din Chakma Autonomous District Council (CADC) chu dan anga ṭhiah a nih theih nan NGO chakna hmangin hma an lak dawn thu an puang a; Tuichawng biala BJP candidate Dr BD Chakma leh MNF candidate RM Chakma te chu foreigner nia an hriat thu an tarlang.

November 24, Inrinnia Aizawl Press Club-a thuthar lakhawmtute an kawmnaah ZPM general secretary James C Lalnun­tluanga chuan, NGO Coordination Committee-in political party tinte Chakma candidate nei lo tura ngenna a siam chu zahawm an ti a, ZPM chuan Chakma candidate an dah lo tih a sawi a, "Pathian leh mipui zara ṭangrual pawlin sorkarna kan siam a nih chuan, dan loa din CADC hi dan anga ṭhiah a nih theih nan NGO chakna hmangin hma kan la dawn a ni," a ti.

James C Lalnuntluanga chuan, Chakma candidate zingah, Tuichawng biala MNF candidate Rasik Mohan Chakma leh BJP candidate Dr BD Chakma te chu dan loa Bangladesh aṭanga Mizorama lut (foreigner) ngei nia hriat thu a sawi. Foreigner pawh thliar loa mahni hamṭhatna chiah ngaihtuaha party ṭhenkhatin candidate an dah chu an dem tak zet tih sawiin, Chakma foreigner candidate an neih chhan sawifiah vat turin BJP leh MNF an phût a ni.

ZPM Vigilance department hotute chuan, Mizorama sorkar awm tawh zingah Brig. T Sailo kaihhruai sorkar chauh chu dan loa Mizorama awm Chakma-te ûm chhuah kawnga hma latu awmchhun a ni tih an sawi a; PC sorkar laiin sipai chakna hmangin Chakma foreigner 11,169 ûm chhuah an nih thu an sawi bawk.

Press conference-ah hian ZPM Legal department secretary Vanlalsiama Pachuau chuan, MLA candidate zinga thubuai neite chu Supreme Court thupek angin chanchinbu leh TV kaltlanga dik taka thubuai an neih dan tarlang tura phût an nih thu a sawi a; tual­chhung chanchinbu darh zauah langsar taka tarlan tur a nih lai a, candidate ṭhenkhatte chuan chanchinbu lian lo-ah an tihchhuah avangin a ṭul anga enfiah turin Mizoram CEO an ngen tih a sawi.

Vanlalsiama Pachuau sawi danin, INC-in an candidate zinga criminal case nei mi pa­hnihte chanchin chu tualchhung chanchinbu darh zau The Zozam Times-ah an tichhuak a; MNF erawh chuan an candidate zinga thubuai neite chanchin chu chanchinbu lian lo takah an tarlang a, hawrawp (font) len zawng pawh Supreme Court thupek aia tê a ni.