Dik taka rorel phûtin Aizawlah kawngzawh

September 7, 2018 zana Zarkawta tlangval rual intihbuaina thleng leh a hnu zanlai pelh, zing khawvar hmaa innghaisakna leh indiriamna a thleng zui nia sawi chungchangah, pawi khawihtu man leh dik taka rorel phûtin November 24, Inrinni khan mi ṭhahnem takin Khatla aṭanga Aizawl Police Station bul thleng kawng an zawh.

Dan ang taka rorel phûttute chu Zofate Insuihkhawm Pawl tia invuahte bultumin Inrinni chhun khan Khatla YMA Rûnah kal khawmin, mi 300 vel an tel a; chumi hnuah Aizawl PS thleng kawng an zawh a, an aurual a ni.

Police hotute sawi dan leh an document-a a lan danin, Zothansanga s/o Lalthanzuali, Zarkawt chuan September 10, 2018-ah police station-ah FIR a thehlut a, a tuk, September 11-ah Aizawl Civil Hospital OPD-ah a inentir. Police-in thubuai an ziak lut duh lo nia hriaiin, September 27-ah Aizawl SP-ah complaint a thehlut a; September 28-ah Aizawl PS-ah thubuai ziah luh niin, case no. 202/2018 u/s 341/342/323/506 IPC ziah luh a ni. Thubuai chu case IO-in a bawhzui ṭha loa an hriat vangin October 15 khan Aizawl SP Office-ah RTI Act hmangin zawhna a zawt leh bawk.

Zothansanga'n amah khawihtua a puh Zodinliana Sailo s/o Lalsang­liana Sailo, Kanan Veng, Aizawl chu October 24-ah police-in an man a, anticipatory bail an neih tawh avangin bail-in chhuak leh nghal a ni. Zodinliana Sailo hian October 10-ah counter FIR a thehlut ve bawk a ni.

He thubuai hi police-te'n an chhui mek a, chargsheet erawh an thehlut lo a, chargesheet thehluh hun a la ral lo nia thu dawn a ni.