YMA chanchinbu ṭha ber nih lawm

Aizawl Chanmari Branch YMA chuan, kum 2016-17 chhunga YMA branch chanchinbu chhuak zinga ṭha berah an branch chanchinbu 'Chanmarians' thlan a nih chu November 23, 2018 khan Chanmari YMA Hall-ah an lawm a; MJA president Zonunsang­a Khiangte khualllian a ni.

Zonunsanga Khiangte chuan, Chanmarians-in YMA branch chanchinbu ṭha ber lawmman a dawng chu thinlung taka a lawmpui thu sawiin, "Chanmarians hi tuna ṭha thar thut a ni lo a, kum rei tak aṭanga tun thlengin a ṭhat dan a ngai reng. Engtik lai mahin thu holam mai maia hnawhkhah ang chi a awm ngai lo a, a zah­awmna leh a puitlinnate a vawng tlat a ni," a ti.

YMA chanchinbu chu a pawimawh tih sawiin Zo­nunsanga Khiangte chuan, "Veng chhung mipuite a tihbengvâr mai piah lamah, a ṭha lama hruai kawngah te, veng mipuite inpumkhatna leh inngeihna kawngah te, veng chhunga kohhran hrang hrang leh pawl hrang hrangte thawhho leh inpawh tlannate hi veng chhung chanchinbu enkawltute ko-ah thui tak a innghat a ni," a ti a; a enkawltute chu ṭang mar reng turin a fuih.

Chanmari Branch YMA kar tin chhuak chanchinbu Chanmarians hi kum 1982-ah chhuah ṭan a ni a, an veng chhungah copy 1,200 vel an sem mek a ni.