Hawla'n Krista dodaltu-ah BJP a puh

Congress party president Lal Thanhawla chuan Inrinni khan Serlui Block Congress Conference, Vairengte community hall-a neihah thu a sawi a; BJP chu Krista dodâltu an nia sawiin, chumi avang chuan India ramah an tlahniam chak hle niin a sawi.

Lal Thanhawla chuan, BJP-in tihchhiat theih zawng zawng an tichhe mek niin a sawi a, "Reserve Bank of India an tichhia a, CBI an tichhia a, Election Commission thunun an tum leh a, mahse, a harsa hle tawh a ni. Hei vang hian nakkuma Lok Sabha inthlanpuiah Congress kaihhruai sorkar a ding dawn a ni," a ti.

MPCC President chuan, kut hnathawk­tute'n an kutkawih ngeia an dinchhuah theih nan NLUP an duang a, Lal Isua lam ṭang a nih avangin hmuhsit leh elsênna karah NLUP chu hlawhtling takin an kalpui niin a sawi a; NLUP vangin Mizoram GSDP a san phah hle niin a sawi bawk.

Inkhawmah hian Serlui biala Congress candidate Lalhmachhuana pawhin thu a sawi a; Serlui bial hmasawnna chu a ngaih pawimawh ber a nih thu leh thlan tlin a nih chuan bialtu MLA lo ni tawhte hmalakna ṭhate chhunzawm a tum thu a sawi a ni.

Thusaiwtu dang, Serluia INC candidate Lal­hmachhuana chuan MNF-te'n INC Candidate-in 'Hmar vote tel loin ka tling thei' tiin thudik lo an thehdarh thu sawiin, "Zofa chi peng hrang hrangte kan insuikhawm a, kan inpumkhat theihna atan zirlai pawl leh ZORO kaltlanga theihtawp loh chhuah ve ṭhin ka nih avangin ka rilru a na tak zet. Dawt hmanga hnam inpumkhatna ti­chhe zawnga politics khel lo turin MNF-te ka ngen. Zofate inpumkhatna duhtu Lalhmachhuana hian Hmar vote tel loa MLA tlin ai chuan bawm ka khar zawk ang," a ti.