Kan do ber chu BJP leh MNF - Congress party

Congress party thupuangtu Lallianchhunga, MPCC Media chairman chuan, kumin 2018 Assembly inthlanpuia Congress party-in kan do ber chu BJP leh North East Democratic Alliance (NEDA)-a an thawhpui MNF-te an nih thu a sawi a; ZPM chu an tlinna tur bial an hmuhsak zo lo niin a sawi thung.

MPCC Media Chairman hian Inrinni khan Aizawl Press Club-ah thuthar thehdarhtute a kawm a; MNF chu BJP-in an vahte (niece/nephew) tiin an ko nia sawiin, "Kumin MLA inthlanpui hi tisa leh thlarau indona a ni ber tawh. Congress party chuan kohhran zahawmna venhim tlat a duh a, MNF president Pu Zoramthanga erawh chuan ‘Kohhran zahawmna hi BJP sorkar vangin a nghing lo, a chhiat phah lo’ tiin Firstpost zawhna a chháng a, hei hi Congress chuan kan ngai thutak hle a ni," a ti.

Mizoram chief minister nih tum Zoramthanga'n ‘BJP an sorkar vang­in kohhran zahawmnain a chhiat phah lo’ tia a sawi chu Mizorama sorkarna siam tlak an nih lohzia lantirtua an ngaih thu sawiin Lallianchhunga chuan, "Kohhran zahawmna venhim a nih theih nan Congress party-in sorkarna a siam leh ngei a ngai a ni," a ti a; MNF an sorkar chuan kohhran rawngbawltute’n Hindutwa movement leh BJP sorkar hmalakna dangte chu pulpit aṭangin an sawi ngam tawh dawn lo niin a sawi.

Lallianchhunga chuan, kum 2008 aṭanga 2018 thlenga Congress sorkar chhungin minister zingah eirûk thubuai nei an awm lo tih sawiin, "A awm thei tur âwm deuh chu Pathianin min ṭhuah faisak a, heng mite hian president ber pawh eiruk thubuai nei awmna MNF an zawm a ni," an ti.