CM leh CM hlui man an ngai dawn - PRISM

PRISM party chuan thuchhuah siam­in, Supreme Court thupek an bawh­chhiat vangin chief minister leh chief minister hlui man an ngai dawn niin an tarlang a; Mizo ram leh hnam damna leh hmasawnna atan PRISM vote turin mipui an ngen.

PRISM chuan, tun ṭum MLA inthlanah candidate zinga criminal case neite'n an affidavit-ah an case an tarlan a ngaih bakah, mipui hriat turin TV leh chanchinbuah an puanzar a ngai tih an tarlang a, "Kumin inthlanah hian BJP aṭangin VL Zahawma Chawngthu leh Lalduhpuii, INC aṭangin Lal Thanhawla leh James Thanghmingmawia, MNF aṭangin Zoramthanga, Dr R Lalthang­liana leh Rasik Mohan Chakma, independent (ZPM) V Malsawmtluanga ten thubuai an nei a ni," an ti.

MLA candidate thubuai neite thubuai kimchang media-ah candidate-te leh an awmna party-te'n an puanzar a ngaih chungchangah hian PRISM chuan, "He thupek hi anmahni pawhin an hre reng chunga an la zâwm famkim loh avangin dan hremna an hmachhawn ngei a ngai dawn a ni," an ti a; CEO-in a sawi tawh angin, a man ngei an ngai dawna a lan thu leh pawi an tih thu an sawi.

PRISM chuan, "Kan ram siamṭha tak tak tur sorkar huaisen kan neih theih ngei nan PRISM candidate-te vote turin mi tin kan sáwm a ni," an ti.