Vote thi ballot paper a bo vangin N Vanlaiphai VC thlang ṭha dawn

August 27, 2020-a village council inthlanah North Vanlaiphai VC thlannaa vote thi ballot paper-te hmuh chhuah zawh a nih loh avangin inthlan buatsaih ṭhat a ni dawn.

N. Vanlaiphai VC thlannaah hian MNF pali, ZPM pahnih leh INC pakhat an tling a; inthlana tling zo lo ZPM pali, INC pakhat leh independent pakhatte chuan inthlan dan chu a rintlak tâwk lo nia hriain Election Tribunal-ah complaint an thehlut a ni. Complaint bawhzui hian November 18 khan vote tlate chu chhiar ṭhat a ni a, vote hmuh zatah danglamna a awm lo.

Hetih lai hian, complaint thehluttute'n vote thi a tam lutuk an tih chu finfiah turin vote thi ballot paper-te hmuh tur a awm tawh lo. Hei vang hian Election Tribunal chuan inthlan chu rintlak tâwk lo tiin, State Election Commission (SEC)-ah report a thehlut a ni.

Vanglaini palai zawhna chhángin SEC secretary Teresy Vanlalhruaii chuan, Election Tribunal report bawhzuiin North Vanlaiphai VC inthlan buatsaih ṭhat a nih tur thu a sawi.

November 18-a vote chhiar ṭhatnaah hian women reservation bikah chuan thil fel lo hmuh chhuah a ni lo a, hei vang hian VC atana thlan tlin mi pasarihte chuan women reservation bikah chuan inthlan ṭhat loh an duh. Vote thi ballot paper hmuh chhuah a nih ngei theihna atana chak taka hma la turin SEC an ngen.

Pangbalkawn, Kolasib district-a VC inthlan pawh complaint a awm avangin vote chhiar ṭhat a lo ni tawh a, result danglam a awm lo a, thlan tlin tawhte chu tlinga puan nawn an ni.