Hripui vei hmuh thar 106 zingah Tualchhunga kai mi 49 an awm
Ni hnih chhung, November 20-21 chhunga Mizorama hripui vei hmuh chhuah mi 106 zingah Mizoram chhunga kái mi 49 an awm a, an zingah State Referral Hospital ICU-a duty nurse pahnih an tel. Covid-19 natna (symptom) lang chhuak mi 12 an awm.
Sorkar thuchhuah aṭanga a lan danin, November 20, Zirtawpnia swab sample endiknaa hripui vei hmuh chhuah mi 66 zingah tualchhunga kái mi 38 an awm. Mi 38 zinga paruk chu an kai ṭanna hriat a ni lo a; Covid-19 symptom lang mi pakua an awm a ni. Sikul aṭanga kai nia hriat mi pali an awm bawk.
Tualchhunga kai mi 38 zinga pasarih, Ṭhuampui venga mite chu tun hnaia Champhaia inneihnaa kalte an ni. Inneihnaa an kalnaa inneite hi chawlhkar liam ta khan Covid-19 positive an ni ve ve tih hmuh chhuah an nia thu dawn a ni a; Champhai DC pawhin Covid-19 chungchanga kaihhruaina dan an zawm loh avangin inneite chu pawisa chawi turin a hriattir a ni. Ṭhuampui venga hripui vei hmuh thar zingah Synod Hospital-a damlo enkawl lai pakhat a tel bawk a, hei vang hian, a awmna ward chu khâr rih a ni.
November 20-a hmuh chhuah zingah hian Bihar Assembly inthlana duty zo rawn haw police pakua an tel a ni.
November 21, Inrinnia hripui vei hmuh chhuah mi 40 zingah tualchhunga kai mi 11 an awm a, state pawn aṭanga rawn lut an tam zawk a, Bihar inthlana duty zo rawn haw police pahnih an tel. Mizoram chhunga kai mi 11 zingah kàina hriat loh an awm lo a, Covid-19 symptom nei mi pathum an awm.
Ni hnih chhung hian State Referral Hospital (ZMC)-a thawk nurse zingah Covid-19 vei pahnih kum 45 mi leh kum 26 mi hmuh chhuah a ni a, hripui veite enkawltu, ICU-a duty ṭhin ve ve an ni. An pahnih hian ZMC hmuna an inkhung hrannaa awm ve ve niin, symptom an nei lo.