Vegetable Market Chain kalpui tum a ni - Agriculture Minister
Agriculture minister C Lalrinsanga chuan, thlai man a tlàwm zawk theihna turin Vegetable Market Chain kalpui tum a ni a, hmalak mek a nih thu a sawi.
Inrinnia thuthar thehdarhtuten an kawmnaah C Lalrinsanga chuan, a thawk rim ber loneitute aia khârchhâwng ho uchuak taka an hlâwk zawk chu ṭha a tih loh thu sawiin, "Thlai man uchuak tak taka khârchhâwng hoin an tisang hi a reh theih nan Vegetable Market Chain kalpui kan tum a, kan buaipui mek. Kalphung tur duan mek a ni a, peih a nih hnuah thlirhoa chak taka kalpui tum a ni," a ti.
Aizawl thlaia châwmtu khaw hrang hranga loneitute chu Agriculture Market Chain hnuaiah society anga kaltir tum an nih thu sawiin Minister chuan, "Sorkarin ṭul leh mamawh an neihte a theih ang angin a pui dawn. Thlai man bithliah thlengin sorkar chuan a enpui ang," a ti a; loneitute hlâwkna tur si, thlai man a tlâwm zawk theihna tur siin a man bithliah tum a nih thu a sawi.
C Lalrinsanga chuan, Aizawl khawpui chu north leh south-ah ṭhen a ni dawn tih sawiin, "North lam hi MIZOFED-in an vil dawn a, south lam chu MAHFED-in an vil ang. Anni hian loneitute'n a zuar turte hnenah thlai an hralhna an enpui ang a, a zuartute zawrh dan thlengin an vilzui dawn. Society hnuaiah felfai takin kan kalpui ang a, a ṭul chuan MIZOFED leh MAHFED hian thlai an leisak mai ang," a ti.
Agriculture Minister chuan, khârchhâwng hoin hlép neia thlai an khâr chhâwng chu a ṭhat lohna a hriat loh thu sawiin, "To uchhuak lutuka an ti ṭhin hi ṭha kan tih loh ber chu a ni. Hlép an neih hi a àwm a, mahse, uchuak chin a awm. Mirethei zawk tan thlai lei ngaihna a awm tawh lo. Chu chu a ni tihbo kan tum ber chu," a ti a; thlai to uchuak lutuk lei lo ngam turin mipui a ngen.
Thlaia intodelh a nih theih nan 'One District, One Crop' kalpui an tum bawk tih sawiin C Lalrinsanga chuan, "Mizorama kan thar ve theih reng, a bik takin alu, dailuah leh tomato-ahte intodelh a nih theih nan theihtawp chhuah kan tum. Heng ringawt pawh hi state dang aṭanga lak luhna atan kan séng hnem lutuk. Chuvangin, a district tawpa thlai chi khat chíng tura hmalak kan tum a ni," a ti.