Harsatna tâwkte ṭanpui turin sorkar phût

Mizoram Pradesh Congress Committee (MPCC) chuan No­vember 21, Inrinni khan thu­chhuah siamin, Chief Minister Relief Fund for Covid-19-a sum lutte chu Covid-19 vanga harsatna tâwkte ṭanpui nan hmang turin Mizoram sorkar an phût tih an tarlang.

MPCC chuan, Covid-19 vei mi 3,500 chuang Mizoramah an awm tawh tih sawiin, "Chhung­kaw tam takin harsatna an tawh phah a, lockdown vawi tam tak kalpui a nih tawh avangin chhung­kaw tam tak eizawnnain a tuar nasa a, sum leh pai harsatna nasa tak a thleng mek a ni," an ti.

CM Relief Fund-ah mi ṭhahnemngai te'n cheng nuai 2,200 chuang an thawhkhawm tawh tih sawiin MPCC chuan, "Hengte hi Covid-19 vei mekte enkawl nan te, lockdown vanga eizawnna chhiat phah ta chhungkaw tam tak ṭanpui nante a rang thei ang bera hman ni se," an ti a; mipui chhawmdàwlna atana sum thawh khawm, sorkar bungraw leina atana hman an dem thu an sawi.

Congress party chuan, CM Relief Fund hman danah Mizo­ram mipui an lungawi lo nia sawiin, "Harsatna tâwk mipui ṭanpuina atan hmang lo a, sorkar insènsona tur âwm ngawih ngawiha ngaih kháwl leh test kit lei nana cheng vaibelchhe tam tak hman a nih avangin mipuiin pawisa an chhûn luh ṭhat duh tawh loh phah a ni," an ti.

MPCC chuan, Congress sorkar laia CM Relief Fund chu cancer leh natna khirhkhàn bik vei te, leimin leh chhiatna dang thleng vanga harsatna tâwkte ṭanpui nan hman a nih ṭhin thu leh, sorkar bungrua lei nan hman a la nih ngai loh thu an sawi bawk.