World Water Day hman a ni

Nimin March 22 kha World Water Day a ni a, Mizoram hmun hrang hrangah hman a ni. Aizawlah chuan PHE department leh Central YMA bultumin Chanmari YMA Hall-ah hman a ni a, chief minister Zoramthanga'n a hmanpui. Thupui chu 'Lei hnuai tui, hmuh theih loh kha hmuh theihah' tih a ni.

World Water Day puala inkhawm buatsaih hi PHE engi­neer-in-chief C Lalrem­siama'n a kaihruai a, CM Zoram­thanga chuan, "Mizo­ramah ruah a sûr a, tui a luang hum hum ṭhin a, khâwl tum a ni ngai lo. Lui mawng a thlen hnuah lak chhoh dan harsa takin buaipui leh a ni ṭhin a, a man a to. Lui mawng a thlen hmaa lâk dan kan ngaihtuah ngai lo," a ti.

Zoramthanga chuan, fûr laia ruahtui khâwl dan ngaihtuah a ṭul tih sawiin, "Tunlai hian Israel technology an tih mai hmangin, tlang chhîpah Syntex leh concrete man to tak taka tih ngai loa tui khawl dan ngaihtuah a ni," a ti a; van aṭanga tui tlate dawn khawm chu sorkar laipui pawhin ngai pawimawhin 'Catch the Rain' hmangin hma an lak thu a sawi.

Lei hnuaia tui awmte lak chhuah a ngaih thu sawiin CM Zorama chuan, "A man tláwm deuha verh dan engineer-te'n an ngaihtuah a ngai. Mahse, lei hnuaia tuite chu a tam ber chu pump a ngai. Diesel leh electric hmanga pump chu a man a to duh a, solar hmanga pump dan zawn hram hram a ṭul," a ti.

Chief Minister chuan, mipuite'n kut kuangkuah se Mizoram chu a hrìn dup tur thu sawiin, "Mahse, ei kan zawn a ngai si. Sorkar laipui hotute bulah pawh pi leh pute aṭanga lo nei ṭhang kan ni a, kan ning tawh. A thlâkna awm se kan duh thu ka thlen," a ti a; kum tin lo vât loa kum 10-30 daih eizawnna siam a nih theih nan sum ngaihtuahsak turin sorkar laipui hotute a ngen thu a sawi.

CYMA president R Lal­ngheta pawhin thu sawiin, "Tuna la damte'n tui thianghlim in leh hman tur kan neih theih nan chauh ni lo, chhuân la awm zel turte pawhin an neih theih nan tuna hma kan lak ṭan a pawimawh. Sorkar department-a thawktute chu ram leh hnam tana ṭhahnemngai tak tak an nih ṭhin avanga YMA hruaitute pawhin thawhpui an thiam a pawimawh," a ti.

World Water Day puala intih­siakna hrang hrang buatsaiha ti ṭhate hnenah Chief Minister leh CYMA President-te'n lawmman an hlan a ni.

Inkhawma tarlan danin, lei hnuai tui pawimawh dan zir­chian­naah khawvel pum huap­ah in chhung khaw­saknaah 50%, lo, huan leh leilet châwmna (irrigation) atan 40% leh industry sector-ah 30% hman a ni.