Champhai Kahrawtah in pali a kâng
March 21, Thawhṭanni zan dar 6:30 vel khan Champhai Kahrawt vengah kângmei a chhuak a, in pali a kâng a, mihring thi leh hliam an awm lo.
Thu dawn danin, in kângte chu - K Lalbiakkunga in (RCC) chhâwng thum, anmahni luah lai te, K Lalbiakkunga in tho (Assam type) chhawng thum, chhungkua pangin an luah lai te, Zothanglawra in (Assam type) chhawng hnih leh, HB Lalbiaksanga in (semi RCC)-te a ni. Hmingdailova in (Assam type) pawh a kâng chhe nual a, Chalhliri in pawh a kan kai hmain ṭhiah a ni bawk.
Kângmei hi K Lalbiakkunga te in hnuaia vawk chaw chhumna aṭanga chhuak nia hriat a ni a, Lalbiakkunga te vawkpui 15 a kâng hlum. In kâng leh bungraw kang chhiate chu a vaiin Rs 1,14,78,000 vel hûa chhût a ni.
Tun hnaiah Mizoramah kângmei chhuak leh in kang hriat tur a awm zauh zauh a; March 20, 2022 khan Bawngkawnah Nazami in kângah a fanu Olivia PC Lalnuntluangi (33) a kâng hlum a ni.