Tín 5-7 hmùn rua-in khat vek se, kum tin cheng maktaduai khat a lei chhuah theih dawn - CM

Chief minister Zoram­thanga chuan, ṭín 5-7 vela zau ram rua-in a khat vek a nih chuan, kum tin cheng maktaduai khat lei chhuah theih a nih tur thu a sawi.

PHE department leh Cen­tral YMA-in nimina Chanmari YMA Hall-a World Water Day an hman a hmanpuinaah Chief Minister chuan, sorkar laipui hotute hnenah 'Kan ramin a thar chhuahte lâk khawm theihna tur min pe u la, Delhi kan tibuai lo ang che u' tia a sawi thu a sawi a, "Ram ṭín 5-7 hmun hi raw hmùnah nei u la, ruain khat vek se, a puma hralh ringawt pawhin kum tin cheng maktaduai khat a lei chhuah theih. A process-in a lêtin a la tam thei," a ti.

Raw ṭangkaina sawiin Zoramthanga chuan, "Khaw­vela boruak ti­thiang­hlimtu ṭha ber a ni. Kângmei vènna atan pawh a ṭha a, a hnah tla a ni mai a, chu pawh dah khawmin lei tihṭhatna atan a ṭha," a ti a; lui humhalhna atan pawh ṭangkai tak a nih thu a sawi.

CM chuan, eizawnna nghet, green area siam theih­na tur si siamsak turin sorkar laipui hotute a ngen thu sawiin, "Delhi-a zirtirtu ho zirtir hmasak an ngai, anmahni bulah pawh ka sawi. Ramngaw humhalh ringawt an buaipui a, mihringin dam khawchhuahna tur a mamawh tih lam an ngaihtuah lo. Ramngaw humhalh leh eizawn­na ṭha tak awm theihna tur formula hriat chhuah a ngai," a ti.

Union Finance Minister hnenah Mizoram budget chu hmun thuma ṭhena hmun khat la ṭhenin, duh dan taka hman phalsak a nih chuan an lâwm zawk tur thu a hrilh tih sawiin Zoramthanga chuan, "Hman dan tur chi hrang hrang an ruahman a, a buai­thlak," a ti a; phai leh Mizoramah formula inang hman tum chu thil buai­thlak a nih thu sawi a ni.