Kuki-Chin National Front volunteer eng emaw zat Mizoramah an awm

Bangladesh rama Chittagong Hills Tract-a Zo hnahthlakte chuan Chin-Kuki state pe tura Bangladesh sorkar an ngiat avangin Kuki-Chin National Front an din a, ralthuam keng volunteer eng emaw zat an nei. Volunteer-te chuan harsatna an tawh avangin an zinga mi 700-800 vel chu Mizoram chhungah an awm mek.

Kuki-Chin National Front (KNF) hruaitute hnen aṭanga thu dawn danin, KNF hian Chittagong Hills Tract-a Zo hnahthlakte'n chak zawka hmasawnna an neih duhin kum 2015 khan development budget hranpa siamsak turin Bangladesh sorkar an ngen a ni.

Chumi hnuah Chittagong Hills Tract khawchhak lam, Zo hnahthlak awm tamna sub-district pakua huamin Kuki-Chin state pe turin sorkar an ngen a; sorkarah memorandum pawh an thehlut tawh a ni.

KNF hruaitute chuan, Bangladesh sorkar leh an ram chhunga hel pawl JSS-te'n inremna an siam hnuah Zo hnahthlak leh tribal Kristiante an chêp sâwt hle nia tarlangin, "Zo hnahthlakte leh Kristian missionary-te nêkchêp an ni a, kan hmasawnna turte danchah a ni a, Zo hnahthlakte tihduh­dahna leh tihluihnaa chhiah khàwnte a awm a, sorkarah inthliarna dik lo tak a awm bawk," an ti. Zo hnahthlakte nèkchêp an nih avangin Zo hnahthlakte tan mahnia inawpna leh inrêlbàwlna neih duhin an inpuahchah tih an sawi.

KNF hruaitute chuan, "KNF-in a tum lian ber chu Chittagong Hills Tract hi Krista rama siam leh Zo hnahthlak zawng zawng an ram ngeia zalen tak leh thlamuang taka awm theia siam a ni," an ti.

KNF hotute sawi danin, KNF chuan kum 2015 khan Manipur-a hel pawlte nen an inbiak bakah, Kachin, Myanmar-ah guerilla training ti turin volunteer tam tak an intir a, training chu kum 2020 -ah an zo a ni. Chumi hnu, kum 2021-ah pawh mi tam tak an training leh bawk.

Guerilla training zo tawh KNF sipai 700-800 vel chu an in aṭanga chhuakin, Mizo­ramah an lut a, Mizoram chhungah camp eng emaw zat neiin an awm mek nia sawi a ni.

KNF hruaitute chuan, Bang­ladesh-a Chittagong Hills Tract-ah hian Zo hnahthlak péng hrang hrang - Bâwm, Páng, Media, Khumi, Khiang leh Lushai-te an awm a, chu'ngte chu hming khata khaikhawm nan Kuki an ti a ni.