ZPM-in CHA-a CT Scan an enfiah

Civil Hospital, Aizawla hun rei tak CT Scan kháwl hman theih loha awm leh chumi avanga damlote harsatna tawhte ZPM party chuan nimin khan a hmunah an enfiah a; Directorate of Health and Medical Education-ah thil awmdan an zawtfiah nghal bawk.

CHA-a CT Scan enfiahnaah hian ZPM Legislature Party secre­tary Dr Vanlalthlana, ZPM PAC member TBC Lalvenchhunga, Vigilance department leh Media & Publicity department hruaitute an kal a ni.

Dr Vanlalthlana chuan, sorkar kalphungah chawp leh chilha thil tih rum rum theih a ni lo tih an hriat rualin, thla ruk dáwn CT Scan hman theih loha a awm tawh chu pawi an tih thu a sawi a, "Mipui mamawhna a nasat êm avangin a rang lama hman a nih thuai theih nan sorkarin hma la thuai se kan duh. Mipui tawrhna leh hrehawmna hi sorkar tawrhna leh hrehawmna ni se, natna neite nat rual hian kan sorkar hi na ve se tih hi CT Scan khawl hman theih loha awm a hmuna kan tlawh chhan a ni," a ti.

ZPM party chuan, mipui mamawh em em, nunna leh thihna hril thei damlo inenkawlna khawl pawimawh hun rei tak hman theih loha a awm chu pawi an tih thu leh, Civil Hospital, Aizawla CT Scan chu an en zui reng dawn thu an tarlang.