Lengpuiah football ground hawn a ni

Lengpui MSSC Sports Complex-a football khelmuala phul lem phah thar chu nimin khan Sports & Youth Services minister Robert Romawia Royte-in a hawng.

SYS Minister chuan, district headquarters thar pathumah phûl lem phah thar a nih thu sawiin, "District headquarters zawng zawngin phûl lem an neih vek tawh bakah, khaw dangahte pawh siam mek zel a ni. Lengpui hi district headquarters ni loah chuan football khelmuala phûl lem phah hmasak berna a ni a, khaw ṭhenawmte leh sikul hrang hrangte pawhin chhawr ṭangkai se ka duh," a ti.

Infiamna leh taksa sâwizawi chu National Education Policy, 2020-in zirnaah a puan tawh thu sawiin Robert Romawia chuan, "Zirna-inte pawhin infiamna an uar vek a ngai tawh," a ti a, nasa lehzuala infiamna hmunhma leh hmanrua siam a ṭul thu a sawi.

Bialtu MLA H Lalzirliana pawhin thu sawiin, "Lengpuia phûl lem phah avang hian Mizoram sorkar sum a hek lo a, GST leh labour cess aṭangin Mizoram sorkarin sum tam tak a hmu zawk a ni," a ti.

Footbal khelmual hi Ministry of Youth Affairs & Sports aṭanga sum hmuh nuai 500 hmanga siam a ni a, a dung metre 110 leh a vâng metre 74 a ni. A sirah paver block remkual chhuah niin, hung vek a ni a, pavillion sak a ni bawk.