ZPM-in Zampui Mizote hmalakna thláwp

Zoram People's Movement (ZPM) party chuan November 21, Inrinni khan thuchhuah siamin, Zampui Hills, Kanchanpur Sub-Division huam chhunga Bru chhungkaw eng emaw zat dah tum vanga Zampui Hills Mizo Convention-te'n kawngzawh leh total bandh an huaihawt chu an thlàwp thu an tarlang. A ṭula an hman turin pawisa an pe a ni.

ZPM party chuan, "Zampui Hill Mizo Convention hmalakna hi ZPM chuan kan thláwp tlat a, Zampui Hills huam chhunga kan unau awmte hian eng harsatna pawh tâwk se, ZPM chu a tàwp thlengin an lamah kan ṭang zel dawn a ni," an ti.

ZPM tarlan danin, January 16, 2020-a Tripura leh Mizoram sorkarin Ministry of Home Affairs kaihhruaina hnuaia inremna an siam anga Tripura-a khawsa zui ta Bru-te Tripura-a an awm ngheh theihna tura hmalakna kal zelah, Zampui Hills, Kanchanpur Sub-Division chhunga chhungkaw 1,950 dah turin Tripura sorkarin a ruahman a; chumi hnuah chhungkaw 5,000 chuang dah tumin hma a la leh a ni.

Zo hnahthlakte harsatna tawh mek chu nasa zawka ngaihvenpui turin ZPM chuan Mizoram sorkar an phût a; Tripura state chu NEDA/NDA-a MNF thawhpui BJP thuneihna hnuaia awm mek a nih avangin an hmalaknain awmzia a neih ngei an beisei thu an tarlang.