Hmun hrang hrangah World Water Day
Nimin March 22 kha World Water Day a ni a, Mizoram hmun hrang hrangah hman a ni.
World Water Day hi Siahaah chuan MADC Forest Hall-ah hman niin, bawrhsap Lalsangliana'n a hmanpui a, ramngaw leh tuihna humhalhna kawngah ṭan la zual turin Siaha district mipui a chah. Bawrhsap hian Day puala intihsiakna hrang hrang lawmman a sem a ni.
Kolasib-ah chuan bawrhsap Dr H Lalthlangliana hoin Kolasib Venglai Parish Hall-ah hman a ni. Bawrhsap chuan tui thianghlim a awm reng theih nan lui leh tui hnarah bawlhhlawh paih lo turin kal khawmte a chah a; Day puala intihsiakna lawmman a sem nghal.
Kolasib SDO Lallawmpuia Sawthly tarlan danin, Mizoramah PHE hmalaknain lei hnuai tui verh chhuahna 2,000 chuang a awm mek a, chu'ng zinga 669 chu a taka hman mek a ni.
Serchhipah chuan PHE department bultumin World Water Day pualin kawngzawh a ni a; chumi zawhah Serchhip Bazar tualah SDO Samuel LR Ralte kaihhruaiin inkhawm buatsaih niin, PHE executive engineer F Lalsanglura leh MJA Serchhip district president C Lalhminghlua ten thu an sawi.
Lawngtlaiah chuan PHE buatsaihin DC conference hall-ah DC mawhphurhna la mektu Marilyn Rualzakhumthangi kaihhruaiin hman a ni a, LADC chief executive member V Zirsanga'n hmanpuiin, tui renchem nachâng hriat a ṭul tak zet thu a sawi. V Zirsanga hian Day puala bike rally kalpui tur Lawngtlai Bullet Club-te DC pisa tual aṭangin a vailiam a, Day puala intihsiakna hrang hrang lawmman a sem bawk.
Mamitah chuan PHE Complex-ah World Water Day hman a ni a, bawrhsap Lalnunhlua'n a hmanpui. Bawrhsap chuan, tui thianghlim hnianghnara a awm reng theih nan lei hnuaia tui awmte humhalh a pawimawh tak zet thu a sawi. DC hian Day puala rally buatsaih a vailiam bakah lemchan intihsiak lawmman a sem a ni.
World Water Day hi College of Veterinary Sciences & Animal Husbandry, Central Agricultural University, Selesih pawhin an hmunah an hmang a; College of Horticulture, Thenzawl pawhin an college conference hall-ah an hmang bawk.
World Water Day pual hian Johnson College Eco Club chuan nimin khan Tuikual lui hnár leh a kam vel tifaiin an hnatlawng bawk a ni.