Ram hruaitute hian retheih kan huam tur a ni - Lalsawta

Mizoram Pradesh Congress Committee (MPCC) chuan 'Chhim hrût fehchhuah' an hman mekah nimin khan Areopagy, Lawngtlaiah vantlang inkhawm an buatsaih a, MPCC president Lalsawta chuan, ram hruaitute'n retheih an huam tur a nih thu a sawi.

MPCC President chuan, Pathian duh danin ram enkawl tur a nih thu sawiin, "Mizoram mipui hian ram ṭha kan nei. Keini aia ram nei chhe zawkte pawh an dinchhuah theih lai hian, ram ṭha em em neitute hian dinchhuah lohna chhan tur chhuanlam kan nei lo. Mizoram mipui, Lai mipuite hian dinchhuah kan duh a, min dinchhuahpui theitu tur hruaitu kan mamawh. Thuneitute thu awih thiam em em Mizo mipui hian dinchhuah kan phu a, kan tlin a ni," a ti.

Ṭhat loh theih lohna sorkar, kalphung dika kal ngam sorkar huaisen siam an tum thu sawiin Lalsawta chuan, "Ram hruaituten kan rawngbawlsakte retheihzia ngaihtuah hian retheih kan huam ve tur a ni. Kan rawngbawlsakte aia hausak tumna kan neih tlat chuan rorelna dik a awm thei lo. Kum 2023-ah hian kan sorkar a nih ngai chuan kan MLA-te'n an hlawh an duh tâwk ang," a ti a, hlawh piah lama hausak tuma hmalakna an pawm dawn loh thu a sawi.

Lalsawta chuan, a thlawna sum sem kalpui an tum loh thu sawiin, "Congress hian sem huau huau lam kan kalpui dawn lo. NLUP pawh kha sem huau huau lam a ni lo, awmze nei taka a hmanna tur ruahman sa veka sem a ni. Amaherawhchu, sorkar leh mipui lamin tih dik loh kan nei a, 'A thlawna sem huau huau' anga ngaihna a awm tlat avangin a nihna tur angin a hlawhtling ta lo a ni. Sem huau huau loin, ṭang puihna kan siam dawn," a ti.

MPCC thuchhuah tarlan danin, MPCC President hian voter 391 Congress party-ah a lâwm lut a ni.