Dy. Chief Minister-in Champhai leh a chhehvela hnathawhte a enfiah

Deputy chief minister Tawnluia chuan Champhai leh a chhehvela a department enkawl UDPA leh PHE kaltlanga hnathawhte nimin khan a enfiah a, District Hospital Champhai leh Champhai Kahrawt Venga kangmei chhuak tuartute leh hnatlangte a tlawh nghal bawk.

Tawnluia chuan hna tlo leh ṭha nakin zela chhawrnahawm leh rotling siam a pawimawh thu sawiin, “Hmasawnna ruhrel thawh mek leh hmachhawpte hi hlawm lian takte a nih hlawm avangin a tahtawl zelin a hlawhtlin theih nan ngaihtuahna sen mek zel a ni,” a ti a, hnathawktu leh viltu department hotute chu project-te a puitlin theih nan ṭhahnemngai taka thawk turin a chah.

Sorkar department hrang hrangah thawktu indaih lohna a awm thu sawiin DPAR minister Tawnluia chuan, “Restructuring committee din niin zirchian chhoh mek a ni a, hri leng vanga hna lak tur tam takte khaihlak a awm avangin hrethiam hram hram ang che u,” a ti a, District Hospital, Champhai chu ramri hnaiah awm a nih avangin sorkarin a ngaihpawimawh thu a sawi bawk.

Deputy Chief Minister hian Champhai Ring Road project, Zotlang Truck Terminal, Solid Waste Management Centre Mualkawi, Keilungliah lui khuah, PAHOSS hnuaia Parking House Site siamna tur te, Champhai Vengsang Bazar siamna tur te, damdawi-in kawng laiha leimin avanga harsatna awmte leh District Hospital Champhai bakah, March 21, Thawhṭanni zana Champhai Kahrawt Veng Thlerpuia kangmei chhuak tuartute leh hnatlangte a tlawh a, hnatlangte thingpui lum nan Rs 10,000 a pe.

Deputy CM hi MLA pahnih Dr ZR Thiamsanga leh C Lalmuanpuia, district bawrhsap Henry C Lalrawnkima leh sorkar hotu dangte’n an ṭawiawm.