MASA-in General Conference an hmang

Mizoram Agriculture Service Association (MASA) chuan nimin khan Tourist Lodge, Chaltlangah general Conference vawi 8-na an hmang a, Agriculture minister C Lalrinsanga'n a hmanpui.

Agriculture Minister chuan, MASA member-te chu MASA din chhan, kut hnathawktute tana hmasawnna thlentu nih hre reng turin a chah a, "Mipui hamṭhatna nasa zawk thlen thei turin thawhhona ṭha neih a pawimawh. Department-ah thawktu indaih lohna a nasa em em a, thawktu lak belh chungchangah theihtawp chhuah a ni," a ti.

Agriculture secretary J Hmingthanmawia pawhin thu sawiin, Agriculture department-in kawng hrang hranga hlawhtlinna duhawm tak tak a nei chu lawmawm a tih thu a sawi a; hma lamah hlawhtlinna thar chang zel turin MASA member-te duhsakna a hlàn.

MASA General Conference hi an president R Lalnunzira'n a kaihruai a, an member thite sûnna hun an hman bakah, member zinga kai sangte lawmpuina leh member thar lawmna hun an hmang a ni.