KHAWTHLIR

MJA golden jubilee
Mizoram Journalist Association (MJA) chuan vawiin chhun dar 1 hian Dawrpui Multipurpose Hall-ah an kum 50-na, golden jubilee an lawm dawn a, chief minister Zoramthanga leh IPR minister Lalruatkima ten an hmanpui dawn. MJA chuan jubilee lawmna hmanpui turin MJA member lo ni tawh leh member ni ṭhin chhungte an sáwm a ni.

Kawng siam dawn
PWD-in vawiin aṭanga Bazar Bungkawn leh Ramthar Venga Sihpui inkar kawng an thawm ṭhat dawn avangin kawng chanve khar a nih dawn thu Traffic SP Rodingliana Chawngthu chuan a tarlang a, hnathawh tibuai thei turin kawngpui sirah lirthei leh bungrua dah phal a ni lo tih a puang.

Kawtchhuah-2022
Labour, Employment, Skill Development & Entrepreneurship (LESDE) department chuan nimin khan Industrial Training Institute campus-ah ni hnih awh tur 'Kawtchhuah - 2022: A start-up fair for Govt. ITI pass-outs’ an buatsaih a, LESDE secretary Lalramsanga Sailo-in a hawng. Kawtchhuah 2022 hi ITI aṭanga zir chhuak tawhte tana hmalakna bul ṭanna tur ruahmanna nei ṭha thlanna tur a ni a, mi 61-in dilna an thehlut a ni.

Health Clinic thar
Serlui bialtu MLA Lalrinsanga Ralte chuan nimin khan a bial chhung Thingthelh khuaah Health Clinic Centre thar a hawng. Lalrinsanga Ralte chuan, Centre-a thawk health worker-te hlawh tur chu MLA fund aṭanga ruahman a nih tur thu a sawi.

Covid-19 sawiho
Task Group on Monitoring of CAB & COVID-19 Restrictions chu an chairman H Lalengmawia, Home secretary hoin nimin khan a pisaah an ṭhu a, district hrang hranga hmalak dan an sawiho. Tarlan danin Aizawl, Mamit leh Kolasib district tih loh district dang zawngah March 1-21, 2022 chhung khan Covid-19 inkaihhruaina bawhchhia mi 244 man an ni a, an pawisa chawi tlingkhawm chu Rs 26,200 a ni.