Bru chungchanga inremna bawhzui turin sorkar phût

Mizoram Bru, Tripura-a awmte an awm hlen theihna tura inremna, Union Home Minister hoa siam tawh chu chak taka bawhzuia hma la turin NGO Coordination Committee (Joint NGO) chuan sorkar an phût.

Joint NGO hruaitute chu November 21, Inrinni khan Central YMA Committee Room-ah an ṭhukhawm a; thuchhuah siamin, January 16, 2020-a Union Home Minister hoa Mizoram sorkar, Tripura sorkar leh Bru páwl hrang hrangin inremna an lo siam tawh, hripui léng vanga hun eng emaw chen bawhzui loha awm tawh chu tihhlawhtlin thuai a nih theih nan chak taka hma la turin sorkar laipui, Mizoram leh Tripura sorkarte an phût tih an tarlang.

Kumin January 16 khan New Delhi-ah Union Home minister Amit Shah, Mizoram chief minister Zoramthanga leh Tripura chief minister Biplab Kumar Deb-te hriatpuiin state pahniha Bru páwl hrang hrangte leh sorkarin inremna an ziak. Inremna ang chuan, Mizoram aṭanga Tripura-a kal Bru-te chu Tripura-ah an awm hlen dawn a ni.

November 30, 2019 hnu lama Tripura relief camp-a la awmte chu an duhthlannain Tripura-ah an awm hlen thei dawn a, Mizorama kîr tawhte erawh chu Tripura-ah an lêt thei dawn lo thung.