Speaker leh MP-in Saisihchhuah an tlawh
Assembly speaker Lalrinliana Sailo leh Rajya Sabha MP K Vanlalvena te chuan November 21, Inrinni khan India leh Myanmar insumdawn tawn natur, Saisihchhuah, Lawngtlai district an tlawh.
Assembly Speaker chuan, Saisihchhuah chu Pathian mi hmasate'n an lo sawi ṭhin township (khawpui) dinna tur a nih thu sawiin, "Chief minister Pu Zoramthanga'n border trade a tuipui em em a, kan MP Pu K Vanlalvena'n a tui em em bawk a, chak takin hma an la mek a ni," a ti a; Pangkhuaa mite'n zangnadawmna beisei miah loa ram hectare 12-a zau an pe chu lawmawm a tih thu a sawi.
MP K Vanlalvena chuan, Myanmar leh Mizoram inkalpawh nan kawngpui lian ṭha zawk sorkar laipui leh Mizoram sorkarin a ruahman mek tih a sawi. MP hian Pangkhua VC hnenah a MP fund a hman theih veleh Saisihchhuah kalpawhna kawng enkawl nan cheng nuai 10 a pek tur thu a sawi bawk.
Saisihchhuah hi Mizoram lamah chuan Pangkhuain a hnaih ber a, Pangkhua aṭangin km. 7-a hlá a ni.