MJA-in golden jubilee an lâwm ; Media hi a ṭha lama hman a ṭha - CM

Mizoram Journalists' Asso-ciation (MJA) chuan nimin khan an kum 50-na, golden jubilee an lâwm. Khuallian chief minister Zoramthanga chuan, media hrang hrangin chak takin hma a sawn thu sawiin, "A ṭha lama hman a ṭha a, a chhe lam pawhin hman theih a ni," a ti.

Inkhawm hi MJA president Zonunsanga Khiangte-in a kaihruai a; Chief Minister chuan, kum 50 tlin chu thil namai a nih loh thu sawiin, "Páwl han din hian kum 50 tlin meuh chu thil harsa tak a ni. MJA keng nung tlattute an fakawm. Tuna journalism lo pian theihna atan a hringtu nu leh pate'n harsatna tam tak an paltlang a, an hlutzia, ropuizia inhrilh nawn fo a ṭul," a ti a; khawvel ṭhan rualin journalism pawh chak taka a ṭhan zel thu a sawi.

Zoramthanga chuan, media chak chho mek chu a ṭha zawng leh a chhe zawnga hman theih a nih thu sawiin, "A ṭha lo zawnga media hman hian chhung leh chhung, ram leh ram, khua leh khua inhuatna a thlen thei," a ti a, media a ṭha lo zawnga hman a nih chuan a tuartu chu a chhe zawnga hmangtute tho an nih tur thu a sawi.

Thu dik tak hâi lang siin, a ṭha zawnga mite hruai zawnga thu ziah a pawimawh tih sawiin CM Zorama chuan, "Mizoram hmél tarlanna chu media in ni. Kan tarlan dan azirin Zoram hmél a mawiin a mawi lo thei. Kan ram a ṭha zawnga chhuah turin mawhphurhna kan nei tih hriat a ṭul. A chhe lam ni lo news ziah tur pawh a tam a ni," a ti.

Chief Minister chuan, sorkar hmasa leh a kaihhruai sorkar ngei pawhin theihtawpin media-te tihhmasawn an tum thu sawiin, "Kan ram hi tê tak leh pachhe tak a nih avangin duh angin journalist-te zár zo tur kan theh chhuak thei lo," a ti a, journalist-te tan sorkar chuan theihtawp a chhuah zel tur thu a sawi.

Khualzahawm IPR minister Lalruatkima chuan, journalism chu hna zahawm, khawvelin a dah hniam theih loh a nih thu sawiin, "Mipui mit leh beng in ni a, dah hniam thiàn in ni lo. Mipuite a ṭha zawnga hruai kawngah in mawhphurhna a sang em em. Sorkar khalh ngiltu leh sorkar finchhuahtu tur mi pawimawh in ni a, a ṭul hunah chuan sorkar sawisel ngam turin journalist-te kan beisei," a ti.

IPR Minister chuan, social media-ah ram hruaitute thusawi kaih tâwia thehdarh leh thu dik tâwk lo thehdarh chíng an tam thu sawiin, "Heng an thusawi kaih tâwia kan thehdarhsakte hi kan ram hruaitute an ni. Kan zah loh chuan tu mahin min rawn zahsak dawn lo," a ti a; India danpuiah Fundamental Rights kan neih rualin, fundamental duty kan nei tih hriat tel a ṭul thu a sawi.

MJA golden jubilee lawmnaah hian Chief Minister-in golden jubilee lungphun a hawng a, IPR Minister-in golden jubilee souvenir - lehkhabu leh documentary film a tlangzarh bakah, IPR director Lallianpuii'n sash a tlangzarh. MJA office bearer lo ni tawhte chawimawina hun hman a ni bawk.

MJA hi March 23, 1972-ah din a ni a, president hmasa ber chu Lal Thanhawla a ni. Tunah hian member mi 193 an awm mek a, an zingah hmeichhia pakua an tel.