KHAWTHLIR

November 21, Inrinni khan Dawrpui Pastor Bial KṬP chuan thisen pek rûnpui an huaihawt a, mipa 55 leh hmeichhia 10-te'n Civil Hospital, Aizawl tan thisen unit 65 an pe. Zobawk South-a ṬKP Horeb Unit leh Sairep Unit pawhin a huhoin BCM Horeb Kohhran Sunday School Hall-ah Civil Hospital, Lunglei tan thisen unit 18 an pe a, a petute mipa 14 leh hmeichhia pali an ni.

Champhai bawrhsap Maria CT Zuali chuan November 20, Zirtawpni khan Champhai Ruantlanga truck terminal tur sak mek chu a hmunah a enfiah a, sorkar official dangte'n an ṭawiawm. Champhai truck terminal peih a nih hmaa hman lailâwk tur truck terminal sakna tur hmunah chak taka puahchah mek a ni a, hman theih thuai beisei a nih thu, sorkar thuchhuahin a tarlang.

Nakkuma Republic Day lawmna, Delhi-a neih tur atan ram pumah NCC cadet thlan mek a ni a, Mizoram aṭangin mi paruk thlan a ni. Mizoram aṭanga thlan cadet paruk, Army Wing-a mi pali leh Air Wing-a mi pahnihte chuan Republic Day camp tura thlitfimna hmachhawn turin November 21, Inrinni khan Mizoram an chhuah­san. Cadet pa­ruk­te hi battalion under officer Jonathan Zo­than­sanga'n a vailiam a ni.

Mizoram Youth Commission (MYC) chairman Dr Vanlalṭan­puia, MLA chuan Novem­ber 21, Inrinni khan a bial Lunglei North chhunga Lunglei Zotlangah higher secondary school sak mek leh Zotlang khelmual leh a panna kawng siam mekte a enfiah. Hengte hi MLA fund aṭanga siam a ni. MLA hian Kanghmun, Haulawng leh Pukpuia damlo, natna khirhkhân veite kanna sum a pe bawk.

State Referral Hospital-ah nimin khan Covid-19 vei mi pahnih dah luh a ni a, anni nen hripui vei mi 45 enkawl mek a ni. SRH-ZMC Bulletin tarlan danin, ICU-ah mi pakhat enkawl niin, ventilator hmantir a ni a; mi dang zawng Isolation ward-ah awmin, ngaihtuahawm an awm lo. Mi 45 awm mek zingah kum 60chung lam mi 15 an tel a ni. ZMC laboratory-ah nimin khan swab sample endik a ni lo.