Central-in vawk zangnadawmna tur Rs 5,84,97,000 Mizoram a rawn pe

Vawk pûl hri, African Swine Fever (ASF) vanga vawk suat neitute hnena zangnadawmna pek tur first instalment

Rs 5,84,97,000 chu March 22, Thawhlehni khan Ministry of Fisheries, Animal Husbandry & Dairying chuan Mizoram sorkarah a rawn pe. ASF vang hian Mizoramah vawk 33,417 a thi a, vawk 10,910 suat a ni.

Animal Husbandry & Veterinary minister Dr K Beichhua chuan, ASF léng a darh zel loh nan AH&Vety department hriatpuinain vawk suat a nih thu a sawi a, "Vawk 10,910 suat neitute tana sorkar laipuia zangnadawmna kan dil chu Rs 11,69,94,414 a ni a, zangnadawmna first instalment Rs 5,84,97,000 chu March 22, 2022 khan Central sorkara Ministry of Fisheries, Animal Husbandry & Dairying-in scheme a neih sa angin min rawn pe a, a lawmawm tak zet," a ti.

Vawk suat ni lo, ASF vanga vawk thite zangnadawmna chungchang chu Disaster Management & Rehabilitation department kaltlangin khuarel chhiatna, natural calamity anga puantir an tum thu sawiin K Beichhua chuan, "Sum leh pai harsatna avanga a remchan loh avangin Planning & Programme Implementation department-ah sum kan dil a, sorkar kum tharah pawh bawhzui zel kan tum," a ti a, beiseina sang tak an neih thu a sawi.

Vety Minister chuan, vawk suat neitute hnena zangnadawmna pek tur chu sorkarin fel takin a chhinchhiah vek thu te, an document pawimawhte an kawl vek tawh thu te, rei lo têah an pek chhuah thuai a beisei thu te, sorkar laipui aṭanga sum an hmuh aṭanga 50% chu Mizoram sorkarin a tum ve tur a nih thu te, tun hnaiah ASF vanga vawk thi an awm leh tâk avangin Mizoram mipui chu sorkar phalna loa vawk la lut lo tura a duh thute a sawi bawk.

Tarlan tawh angin, March 2021 aṭang khan Lungsen khuaah chhan hriat loha vawk thi a awm ṭan a, AH&Vety department-in an zir chiang a, April 15, 2021 khan sorkar laipui chuan Mizoramah ASF a léng tih a puang a ni.