Governor leh Minister Zira an inkâwm

Governor Hari Babu Kambhampati chuan nimin khan Raj Bhavan-ah Power & Electricity minister R Lalzirliana a kâwm a, Mizoramin a mamawh zat kawlphetha a siam chhuah theih dan tur a sawipui.

Dr Hari Babu Kambhampati chuan, Mizoram tan hmasawn turin kawlphethaa intodelh phawt a ṭula a hriat thu sawiin, "Tui luang chakna hmanga kawlphetha siam ringawt bakah, nizung chakna hmanga siam turin mipui kan phûr thar a ṭul," a ti a, Mizoramin power project-te neih belh tumna a neih chuan theihtawp chhuah a tum thu a sawi.

Governor chuan, kawlphetha indaih lohna a ziaawm theih nan power sub-station awm mekte bul hnaiah mini-solar plant din zel turin PE Minister a chah a, "In chunga solar plant bunna tura sum leh paia harsnatna nei lo turte chu PE department hnathawkte'n rooftop solar plant hmang tel turin fuih se, a ṭhatna leh êng chhit man tihhniamna a nih dante chipchiar taka hrilh chhunzawm an ngai," a ti.

Power minister R Lalzirliana chuan, sorkar leh mipuite'n kawlphetha intodelh an duh vek tih sawiin, "Kan harsatna chu project khawihna tur sum a ni. Hydel project siamna turin sum mamawh a lian tham ṭhin si a, hmalak chak a awlái lo hle a ni," a ti a; hydel project siam tumna a awm phawt chuan mipui aṭangin dodalna a awm a rin loh thu a sawi.