MNF advertisement hmanga thawktu lâk Sût leh turin Education Minister ngen

Mizo Students’ Union (MSU) General Headquarters chuan thuchhuah siamin, SEDP hnuaia zirtirtu lâk kal mekah East Lungdar Primary School-a zirtirtu tur pahnih leh East Lungdar High School atana LDC pakhat lak turah East Lungdar MNF Group-in advertisement an chhuah chu pawi an tih tak zet thu an tarlang a; MNF-in advertisement an chhuah hmanga thawktu lak chu sût an phût.

MSU chuan, MNF East Lungdar group-in advertisement hmanga sikul pahniha thawk tur mi pathum lâkte chu sût (cancel) a nih theih nan leh School Managing Board kal tlanga lak ṭhat leh vek a nih theih nan hma an la a, nimin khan School Education minister Lalchhandama Ralte hmuin an sawipui a ni.

Minister Lalchhandama Ralte chuan, MSU hruaitute thu thlen chu a hriat tawh thu leh thil dik lo awm thei vên nan a hriat ni la lâin MSU duh dan thlen anga hma a lâk nghal thu a lo hrilh tih MSU chuan an tarlang.

MSU chuan, academic session thar atana nursery aṭanga pawl 12 zirlaite'n April 5, 2022 aṭanga zirna pangngai an chhunzawm tur chu lawmawm an tih thu sawiin, "Hun rei tak chhung zirlaite'n hripui léng avangin zirna mumal kan dawng thei tawh lo a, School Education department-in hetiang thutlukna a siam ta hi zirnain hmasawnna chak zawk a hmuh ngei kan beisei tlat a ni," an ti.