Hruaitu ṭha kan neih phawt chuan Mizoram hi kan dingchhuak thei - Lalsawta

Mizoram Pradesh Congress Committee (MPCC) president Lalsawta chuan nimin khan Mizoram chhim lama 'Chhim hrût fehchhuah' hun an hmannaah thu sawiin, "Hruaitu ṭha kan neih phawt chuan Mizoram hi kan dingchhuak thei," a ti.

MPCC office bearer-te chuan nimin khan Bungtlang South, Serkawr leh Tuipang tlawhin vantlang inkhawm an buatsaih a; Lalsawta chuan, "Mizoram hi a dingchhuak thei. Keini aia ram nei chhe zawk, thlaler eng emaw zatin a khuh, Mizoram tiat lek Israel ram pawh an dinchhuah theih chuan eng vangin nge kan dinchhuah theih loh bik ang?" a ti a, Mizoram mipui an ṭha a, dingchhuak turin hruaitu ṭha neih a ṭul thu a sawi.

Congress party-in hnam tênau zawkte a ngaihtuah ṭhin tih sawiin Lalsawta chuan, "Pu Lal Thanhawla hun lai aṭang tawhin hnam chak lo leh tlém zawkte kan ngaihthah ngai lo a, kan ngai pawimawh em em ṭhin," a ti a; autonomous district council-te chu duhsak an ṭul thu sawiin, "Kan sorkar leh a nih chuan hmasawnna a awm ngei ang. Congress party hian hnam tênau zawkte a nékchêp ngai lo," a ti.

Congress President chuan, Mizoramin hun harsa a tawng mek nia sawiin, "Kan ram hi rùnin a awm mek a, min rúntute hian silai an hmang lo a, kan hrethiam lo mai mai a ni. Hlemhlêtna hmanga rùn kan ni a, mipuiin kan chanvo kan chang thei lo ṭhin. Kum 2023-ah sorkarna kan lâk phawt chuan ṭang puihna hmangin dinchhuahna khawp ṭanpuina kan inpe dawn," a ti a; ṭanpuina an pek rualin, mipui an ṭan ve a ngai a, ṭan la peih lote puih an tum loh thu a sawi.

MPCC vice president Lal Thanzara chuan, Mizorama hmasawnna lian tham zawng zawng chu Congress sorkar hnathawh deuh vek a nih thu sawiin, "Referral Hospital leh medical college kan din a, tuna Mizorama kawngpui zau pui puia laih thar zawng zawngte hi Congress sorkar laia bul ṭan vek a ni," a ti a; MNF-in kawng chhâwng leh traffic jam free an tiam laiin, a taka hmuh tur a awm loh thu te, cheng nuai thum sem an tiamah dawng an la awm loh thute a sawi bawk.

MPCC treasurer Zodintluanga Ralte pawhin thu sawiin, "Congress sorkar a din apiangin minority-te tan a thlamuanthlak ṭhin a, MNF an sorkar apiangin minority-te chanvo tihbawrhbàn a ni ṭhin. District council pathuma mipuite'n an aiawh an thlan chhuahte chu tihbuai an ni ṭhin a, an vau a, hna thawk thei loin an siam ṭhin," a ti.

Zodintluanga chuan, "Congress party chuan 'CM ka nih chuan hlemhlêtna a fihlim lo minister leh MLA-te ka bàn ang' ti ngam president, CM candidate kan nei a, Pu Zoramthanga hi Congress-a awm chu ni se bàn hmasak ber tur a ni ang," a ti bawk.