BJP Shaheed Diwas & Cleanliness Drive

BJP, Mizoram Pradesh chuan nimin khan an pisaah Shaheed Diwas leh Cleanliness Drive an hmang a; an president Vanlalhmuaka chuan, sorkarna an siam hunah khawlai fai mai ni lo, sorkar fai, corruption awm lohna an siam dawn thu a sawi.

Vanlalhmuaka chuan, Mizorama politician-te'n mipui hre lo zawkte lâwm zawng leh thu ṭha tak tak an sawi ṭhin thu sawiin, "Mizorama MLA election kan neih zawh tâkah khan Congress tihbo nan MNF kha talhtumah BJP chuan kan hmang a, kan tum kan hlawhtling tawh. MLA Election 2023-ah chuan Pathian puihnain Mizoramah sorkarna kan siam ngei ngei dawn a, sorkarna kan siam hunah chuan Clean Mizoram tak tak, khawlai fai mai ni lo, sorkar fai - corruption awm lohna kan siam dawn a ni," a ti.

BJP, Mizoram Pradesh hian Shaheed Diwas puala inkhawm an hman zawhah kawngpui leh luikawr tihfai hnatlang an nei nghal a ni.