Gas home delivery kalpui dan tur rél

Food, Civil Supplies and Consumer Affairs (FCSCA) secretary Zothanmawia kaihhruaiin nimin khan Secretariat conference hall-ah eirawngbawlna gas (LPG), a leitute ina dah (home delivery) chungchang sawiho a ni a; Aizawla LPG distributor 11-te'n an huam chhunga veng pakhat ṭheuhah LPG home delivery kalpui turin an ruahman.

Ṭhutkhawmah hian LPG home delivery kalpui tawh dan leh harsatna awmte sawiho a ni a; Indian Oil Corporation sales general manager Mainik Patra, Borkhola Bottling Plant chief plant manager Z Lungdim, Central YMA, Mizoram Consumers Union, Aizawl City Area Local Council Association leh distributor aiawhte an tel.

Tarlan danin, Mizoramah pilot project atan September 5, 2019 khan MIZOFED chuan College Vengah LPG home delivery a kalpui ṭan a; Sub-Committee of Consumer Advisory Committee on LPG ruahmanna angin LPG home delivery rate chu IOC-in rate a siam bakah mipuiin Rs 70 an chawi belh turin ruahman a ni.

MIZOFED-in College Vengah, Zothan Indane-in Zonuamah, Caravan Gas-in Falkland Vengah, Suakchhunga Gas Agency-in Dawrpuiah home delivery an kalpui mek a; home delivery la kalpui lo distributor pasarihte bakah, kalpui mekte pawhin veng tam zawka an kalpui theih nan ruahmanna an siam a ni.