Serchhip district-ah vawk khuahkhirh

Serchhip additional DC Lalmuansanga Ralte chuan, African Swine Fever (ASF) leh natna dang lakah Serchhip district a fihlim theih nan nimin khan thupek a chhuah a; vawk damlo leh thi an awm chuan AH&Vety department hotute hriattir vat tur a nih thu a tarlang.

Lalmuansanga Ralte chuan, Serchhip district-ah ASF vanga vawk damlo leh thi a awm tâk loh thu a tarlan rualin, ASF leh natna dang laka an fihlim zel theih nan leh vawk vulhtute'n harsatna an tawh loh nan khapna thupek chhuah a ṭul thu a tarlang a; thupek chu thla hnih chhung hman tur a nih thu a tarlang bawk.

Vawk chungchanga thupek
1. Ram dang aṭangin vawk, vawksa leh vawksa aṭanga thil siam lak luh phal a ni lo.
2. State páwn aṭanga vawk la lut turte'n AH&Vety aṭangin phalna an la hmasa tur a ni.
3. District chhung leh district dang aṭanga vawk la lut turte'n veterinary health certificate, CSF vaccination certificate leh tualchhung vawk ngei a ni tih hriatpuina VC/LC lehkha an nei tur a ni.
4. Vawk hrisel ṭha chauh talh tur a ni a, vawk neitute'n vawk damlo an hralh tur a ni lo.
5. Vawk thite chu lei thûk takah phûm tur a ni.