Hripui vei enkawl lai 0.55% chiah an awm

Mizoramah nimin tlai dar 5 thleng dinhmun angin Covid-19 vei enkawl lai mi 1,221 an la awm a, chu chu positive hmuh tawh zawng zawng aṭangin 0.55% chiah a ni tawh. State Referral Hospital-ah hripui vei enkawl lai mi 33 chiah an awm bawk.

March 22, Thawhlehni khan Mizoramah Covid-19 vei mi 159 hmuh chhuah a ni a, nimin khan hripui vei dam tawh mi 265 chhuahtir an ni a, hripui vanga thi an awm lo.

Covid-19 vei Thawhlehnia hmuh thar mi 159-te chu mipa 73 leh hmeichhia 86 an ni a; RT-PCR hmanga hmuh chhuah pahnih, TrueNAT hmanga hmuh pakhat, RAT hmanga hmuh 155 leh FIA hmanga hmuh pakhat niin, positivity rate 7.92% a ni.

IDSP record angin, Mizoramah Covid-19 vei 2,23,152 hmuh chhuah a ni tawh a, mipa 1,04,089 leh hmeichhia 1,19,063 an ni a, mipa aiin hmeichhia 14,974-in an tam zawk. Nimin tlai dar 5 thleng khan mi 2,21,253 (99.15%) chhuahtir an ni tawh a, mi 678 (0.30%) thi tawhin, enkawl mek mi 1,221 (0.55%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,23,152 chu mi 1,000 zelah hripui vei mi 203 an awm ang a ni a; mi 1,00,000 zela Covid-19 vangin mi 61 an thi tawh ang a ni tih sorkar thuchhuakin a tarlang.

State Referral Hospital-ah nimin tlai dar 5 khan Covid-19 vei enkawl mek 33 chiah an awm a, an zinga pathum chu nimina dah luh an ni. Mi 33 zinga paruk chu ICU-ah enkawl an ni a, ICU-a enkawl zinga mi pathum chu ventilator hmantir an ni.