KHAWTHLIR

Thisen pe
PYD (NEI), Bethlehem Bial chuan nimin khan Civil Hospital, Aizawl tan thisen unit 33 an pe a, petute mipa 23 leh hmeichhia 10 an ni a; Mizoram Hindi Training College NSS-in thisen unit riat an pe bawk. Nimin vek khan Saiha College NSS-te'n District Hospital tan unit 11 an pe a, petute mipa pariat leh hmeichhia pathum an ni.

MJA inkhawmpui
Mizoram Journalists' Association (MJA) chuan vawiin hian Dawrpui Multipurpose Hall-ah General Conference vawi 48-na an hmang dawn. Chawhma lama inkhawmah Legislative Assembly speaker Lalrinliana Sailo khuallian a ni dawn a, chawhnu inkhawmah hruaitu thlan leh rorel a ni ang.

MUP in hawng
AMC Ward-III councillor C Lalchhandami chuan Property Tax Return 2021-22 sum hmanga a bial chhung, Ramhlun Sports Complex-a MUP in sak thar a hawng. C Lalchhandami chuan, MUP-te'n an mamawh leh inkawm hlimna tur in, AMC Property Tax Return hmanga an sa zo thei chu a lawmpui thu sawiin, ṭangkai thei ang bera hmang turin duhsakna a hlân.

Ṭanpuina hlân
Deputy speaker Lalrinawma chuan March 22, Thawhlehni khan a bial chhunga Covid-19 hluarna Hmawngkawn khua a tlawh a, enkawlna hmuna awmte tan mamawh hrang hrang leh Rs 70,000 a hlân a ni.

SDGs zirho
Planning & Programme Implementation department leh Serchhip DC pisa chuan nimin khan DC conference hall-ah 'Workshop on Implementation, Monitoring and Localization of Sustainable Develop-ment Goals' an buatsaih a, Planning secretary Lalmalsawma Pachuau-in a hmanpui.

Meterological Day
Kolasib-a ICAR Regional Center leh Lengpui KVK chuan nimin khan KVK training hall-ah 'World Meterological Day' an hmang a, mithiamte'n sik leh sa inthlak danglamin thlai thar a nghawng theih dante loneitute an zirtir a ni.