'Vote Thlâk Hnam Hnatlang' nei turin CEO-in mipuite a sáwm

Mizoram chief electoral officer (CEO) Ashish Kundra chuan, naktuka Mizoram Legislative Assembly inthlanpui neih turah inbuatsaihna peih a ni tawh tih a sawi a; Mizoram mipuite chu 'Vote thlak hnam hnatlang' nei turin a sáwm.

Ashish Kundra hian nimin khan Secretariat Annexe Media Center-ah thuthar thehdarhtute kâwmin, Mizoram inthlanpui atan inbuatsaih zawh a ni tawh tih a sawi a, "Inbuatsaihna a kal tluang a, kan inpeih tawh a, polling station hrang hrangah hmanrua leh bungruate dah kim a ni tawh. Mizoram mipuite'n vote thlak turin hnam hnatlang i nei ang u," a ti.

CEO Ashish Kundra sawi danin, Mizoram inthlanpui neih turah hian candidate 209 an awm a, voter 7,70,395 awmin, mipa 3,75,498 leh hmeichhia 3,94,897 an ni.

Service voter 4,363 an awm a, service voter-te'n electronic ballot hmang-in vote an thlak tawh. Pianphunga rualbanlo voter 3,915 an awm a, chu'ng mite chuan harsatna nei loa vote an thlak theih nan remchang siam a ni. Polling station 40-ah webcasting tih a ni ang.

CEO chuan, polling station tinah hmeichhiate chauh vote thlakna tur siam a ni dawn a, Mizoramah chuan hmeichhiate vote thlakna tur pollling station bikte chu ‘Dingdi’ tih a nih thu sawi a, "Mitdel leh mit lama harsatna neite tan braille EPIC sem vek a ni bawk," a ti.

Ashish Kundra chuan, Tripura-a awm mek Mizoram Bru-te'n vote an thlakna tura ruahman, Kanhmuna special polling station-te chu November 25 khan a enfiah leh tih a sawi a, "Bru polling station-te hi peih thawhkhat a ni tawh. Kanhmuna NGO-te leh kohhrante'n min thláwp ṭha a, kan lawm hle. Kanhmuna Bru polling station bikah hian zing dar 7 aṭanga tlai dar 3 thleng vote thlak theih a ni ang," a ti.

Zawhna chhangin CEO chuan, Tripura relief camp-a Bru-te Kanhmuna vote thlak tura an kalna motor chu Tripura sorkarin a ngaihtuahsak dawn a, a senso Mizoram sorkarin a tum dawn tih a sawi a, "Tripura ram chhungah Mizoram ramri dep thleng motor-in an phur ang a, chuta ṭang chuan polling station a hla tawh lo a, ke-in an kal tawh dawn a ni," a ti a; Tripura-a Mizoram Bru voter zat chu mi 12,026 an ni tih a sawi a ni.

Ashish Kundra chuan, inthlan atana campaign hun chu nimin tlai dar 4 khan a tawp tawh tih sawiin, campaign phal tawh loh chu zawm turin party leh candidate tinte a chah a; nimina political party-te'n press conference an neiha an thu leh hlate chu vawiinah media-ah tihchhuah phal a nih leh nihloh zawhna chhangin, paid news/advertisement leh public rally/campaigning a nih loh chuan tihchhuah phal a nih thu a sawi.