Vulnerable area 36 leh critical PS 47-ah Mizoram police leh CAPF-te duty tir a ni
Mizoram Police chuan thuchhuah siamin, Mizoram inthlanpui awm turah venhimna lam hna thawkin theihtawp an chhuah mek thu an tarlang a; Mizoram puma venhim ngai bik - vulnerable area 36 leh critical polling station 47-ah Mizoram police leh central armed police force (CAPF)-te an duty thu an puang.
Police PRO thuchhuah chuan, Mizoram inthlanpui atana inbuatsaihnain a vawrtawp a thleng mek tih sawiin, "District hrang hranga SP-te'n DGP Balaji Srivastava kaihhruaina hnuaiah venhimna lama ruahmana felfai takin an siam a, tunah chuan unit hrang hrangte kan inbuatsaihnaah inthlanpui muanawm tak leh felfai taka nei turin kan inpeihfel thawkhat ta," a ti.
Police thuchhuah tarlan danin, Mizoram inthlanpui neih turah hian district pangaah venhim ngai bik (vulnerable area) 36 awmin, critical polling station 47 a awm a, chu'ngahte chuan Mizoram police leh CAPF duty tir a ni. Tripura relief camp-a awm Mizoram Bru-te tan Mamit district-a Kanhmun khuaah special polling station 15 siam pawh ven uluk ngai zual zinga dah a ni.
Mizoram police leh CAPF-te chu static surveillance team, flying squad, quick response team, patrolling, naka/checkpost, zonal police officer, sector police officer, EVM strongroom guard, candidate leh observer-te vil hna an thawk a; polling station-te wireless network leh mobile phone network-in a cover vek tura ruahman a ni.
Inthlanna muanawm leh zalen a awm theih nan ruih theih thil chi hrang hrang dap hna an thawk a; November 25, 2018 thleng khan Rs. 4,19,64,610 hû ruihhlo chi hrang hrang an man tawh.
Mizoramah inthlanna muanawm leh felfai, chhinchhiah tlak tak a awm tawh ṭhin tih sawiin Police thuchhuah chuan, "Mipuite'n dan kan zawm ṭhat ṭhin vang te, NGO-te leh kohhran hruaitute leh MPF-te sorkar official-te nen ṭha taka kan thawhho vangte a ni," an ti a; tun ṭum inthlanah pawh thawhhona ṭha tak a awm zel an beisei thu an sawi.
Police thuchhuah chuan, rálmuang tak leh boruak ṭha tak hnuaiah Mizoram inthlanpui tluang taka a kal theih nan mipui, NGO, kohhran leh political party tinte chu venhimna lam hna thawktute ṭawiawm zel turin an ngen a; Mizoram inthlanpui chu India rama inthlanna thianghlim leh felfai ber a nih theih nana hma la ṭheuh turin mi tin an sáwm a ni.